ខេត្ដបន្ទាយមានជ័យ៖ អាជ្ញាធរខេត្តបានឲ្យដឹងថា បើគិតមកដល់វេលាយប់ ថ្ងៃទី១៧ ខែតុលា ឆ្នាំ២០២០ ទឹកភ្លៀងបានហូរធ្លាក់យ៉ាងខ្លាំង មកពីប្រទេសថៃ បណ្ដាលឲ្យជន់លិចតំបន់ខ្លះ នៃស្រុកថ្មពួក ស្រុកអូរជ្រៅ និងក្រុងប៉ោយប៉ែត។
លោក អ៊ុ រាត្រី អភិបាលខេត្តបន្ទាយមានជ័យ បានបញ្ជាក់ថា រហូតមកដល់វេលានេះ ទឹកភ្លៀងបានហូរធ្លាក់យ៉ាងខ្លាំង មកពីប្រទេសថៃផង និងទឹកភ្លៀង នៅក្នុងប្រទេសផង ធ្វើឲ្យបរិមាណទឹកជន់លិច នៅតាមផ្នែកខ្លះ នៃក្រុងប៉ោយប៉ែត និងអូរជ្រៅ ។ ដោយសារតែគ្រោះទឹកជំនន់ហូរជន់លិចបែបនេះ ទើបលោក និងសមត្ថកិច្ចពាក់ព័ន្ធ កំពុងតែចុះជម្លៀសប្រជាពលរដ្ឋទាំងយប់ ដើម្បីបញ្ជូនពួកគាត់ទៅរកទីទួលមានសុវត្ថិភាព។
លោកអភិបាលខេត្តបន្ទាយមានជ័យ បានបន្ថែមថា ទឹកហូរមកពីប្រទេសថៃនេះ មិនមែនជាការបើកទំនប់នោះទេ តែវាជាទឹកភ្លៀងហូរធ្លាក់មកតែប៉ុណ្ណោះ។ ដោយឡែក ទំនប់ទឹកនៅក្នុងខេត្តស្រះកែវនោះ ថៃធ្លាប់ជូនដំណឹងមកភាគីកម្ពុជាថា ថៃនឹងបើកមកនោះ គឺគេមិនទាន់បើកនៅឡើយទេ។ រហូតមកដល់ពេលនេះ ប្រជាពលរដ្ឋនៅប៉ោយប៉ែត ប្រមាណ៥០គ្រួសារ ត្រូវបានជម្លៀស ចេញពីលំនៅឋាន។ រីឯប្រជាពលរដ្ឋដែលត្រូវប្រឈមនឹងការលិចលង់ ត្រូវបានជូនដំណឹងឱ្យត្រៀមលក្ខណៈក្នុងការជម្លៀស ខណៈកងកម្លាំងត្រូវបានណែនាំត្រៀមលក្ខណៈជួយសង្គ្រោះ និងជម្លៀសពួកគាត់។
លោកទេសរដ្ឋមន្ត្រី គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ កំពុងឈរជើងនៅខេត្តបន្ទាយមានជ័យ បានបញ្ជាក់ថា ទឹកធ្លាក់មកពីថៃ បានហូរបុកមកយ៉ាងខ្លាំង ចូលក្នុងឃុំចំនួនពីរ នៃស្រុកថ្មពួក។ នៅពេលនេះ លោកបានបញ្ជាឲ្យកងពលតូចថ្មើរជើងលេខ៥១ យោធាខេត្ត នគរបាល និងកងពលពិសេស៩១១ ចេញទៅសង្គ្រោះប្រជាពលរដ្ឋភ្លាមៗ ។ កងកម្លាំងខ្លះបានជួយជញ្ជូនទ្រព្យសម្បត្តិរបស់ប្រជាពលរដ្ឋ នាំទៅដាក់ទីទួលមានសុវត្ថិភាព។
បើគិតមកដល់ថ្ងៃទី១៧ ខែតុលា ឆ្នាំ២០២០ គ្រោះទឹកជំនន់នេះ បានសម្លាប់ប្រជាពលរដ្ឋរស់នៅខេត្តបន្ទាយមានជ័យ ចំនួន១២នាក់។ ប៉ុន្ដែដើម្បីជួយដោះស្រាយការលំបាកនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី១៧ ខែតុលា នេះ បានសម្រេចបន្ថែមកញ្ចប់ថវិកាចំនួន១០ម៉ឺនដុល្លារបន្ថែមទៀត ជូនដល់ខេត្តខេត្តបន្ទាយមានជ័យ ដោយទទួលបានថវិកាសរុបចំនួន២០ម៉ឺនដុល្លារ។
បើតាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ខេត្តបន្ទាយមានជ័យ បានជន់លិចក្រុង/ស្រុក ចំនួន៩ និងឃុំ/សង្កាត់ចំនួន៤៩។ គ្រោះទឹកជំនន់នេះ បានធ្វើឱ្យប៉ះពាល់ប្រជាពលរដ្ឋ ជាង១ម៉ឺនគ្រួសារ ហើយប្រជាពលរដ្ឋ ជាង២ពាន់គ្រួសារ ត្រូវបានជម្លៀសទៅរកទីទួលសុវត្ថិភាព៕