រដ្ឋធានីប៉េកាំង៖ ប្រធានមន្ទីរពេទ្យម្នាក់ និងប្រធានគណៈកម្មការសុខាភិ បាលទីក្រុងឈីងតាវ ជាប់ពាក់ព័ន្ធនឹងករណីថ្មី នៃការផ្ទុះវីរុសកូរ៉ូណា ឬកូវីដ១៩ ហើយត្រូវបានរដ្ឋាភិបាលចិន សម្រេចដាក់ទណ្ឌកម្ម លើពួកគាត់ ដោយម្នាក់ត្រូវព្យួរការងារ និងម្នាក់ទៀត ត្រូវបណ្ដេញចេញពីតំណែង។
បើតាមក្រសួងសុខាភិបាលចិន បានឲ្យដឹងថា មន្រ្ដីសុខាភិបាល២រូប ដែលរងនូវការដាក់ទណ្ឌកម្មនោះ រួមមាន ទី១-លោកប្រធានគណៈកម្មការសុខាភិបាលទីក្រុងឈីងតាវ (ត្រូវព្យួរការងារ) និងទី២-ប្រធានមន្ទីរពេទ្យ Qingdao Chest ជាប្រភព នៃការឆ្លងថ្មី នៃវីរុសកូវីដ-១៩ ត្រូវបានបណ្តេញពីតំណែង។
ទីភ្នាក់ងារសារព័ត៌មានរបស់ចិន ស៊ីនហួ បានផ្សាយថា នៅក្នុងទីក្រុង Qingdao ត្រូវបានគេរាយការណ៍ថា មានការឆ្លងថ្មី នៃកូវីដ-១៩ ចំនួន១៣ករណី ហើយភាគច្រើន ជាប់ពាក់ព័ន្ធនឹងមន្ទីរពេទ្យ Qingdao Chest ជាទីដែលអ្នកធ្វើដំណើរឆ្លង មកពីបរទេស។ ក្នុងចំណោមករណីឆ្លងថ្មី នៃកូវីដ-១៩ បានកើតលើកម្មករម្នាក់ ធ្វើការនៅក្នុងកំពង់ផែមួយកន្លែង។ ប៉ុន្តែការវិវឌ្ឍរបស់រោគសញ្ញានេះ បានកើតឡើង បន្ទាប់ពីឆ្លងបានរយៈពេលប្រហែល២០ថ្ងៃ។
ដោយឡែកអាជ្ញាធរទីក្រុងឈីងតាវ បានប្រកាស នៅសប្តាហ៍នេះថា អាជ្ញាធរនឹងធ្វើតេស្តលើប្រជាជនរបស់ខ្លួនទាំងអស់ មានចំនួន៩លាននាក់ ក្នុងរយៈពេល៥ថ្ងៃ។ ប៉ុន្ដែបើតាមរបាយការណ៍ចុងក្រោយ បានបង្ហាញថា ប្រជាជនជាង៧លាន ត្រូវបានធ្វើតេស្ដ រកឃើញលទ្ធផលអវិជ្ជមាន។ រហូតមកដល់ពេលនេះ អាជ្ញាធរចិន បានចាត់វិធានការយ៉ាងម៉ឺងម៉ាត់ ដើម្បីទប់ស្កាត់ការរីករាលដាល នៃវីរុសកូរ៉ូណា ក៏ដូចជា ការធ្វើយុទ្ធនាការធ្វើតេស្តទ្រង់ទ្រាយធំផងដែរ។
សូមជម្រាបថា វីរុសកូរ៉ូណា ហៅកាត់ កូវីដ-១៩ (Coronavirus Disease 2019) បានផ្ទុះឡើងជាលើកដំបូង កាលពីអំឡុងខែធ្នូ ឆ្នាំ២០១៩ នៅក្នុងទីក្រុងវូហាន (ចិនអាន «អូហាន») ខេត្តហ៊ូប៉ី នាភាគកណ្ដាល ប្រទេសចិន។ បើគិតមកដល់ព្រឹក ថ្ងៃទី១៧ ខែតុលា ឆ្នាំ២០២០ នៅលើពិភពលោក មានអ្នកឆ្លងបន្ដកើនឡើងដល់ ៣៩ ៥៧៣ ០៤៣នាក់ ស្លាប់ ១ ១០៩ ០៧០នាក់ និងអ្នកជាសះស្បើយ ២៩ ៦៥៣ ៤៣៤នាក់។ រីឯប្រទេសចិន ជាប្រភព នៃដើមកំណើតវីរុសកូរ៉ូណានោះ មានអ្នកឆ្លង ៨៥ ៦៥៩នាក់ (ឆ្លងថ្មី១៣នាក់) ស្លាប់ ៤ ៦៣៤នាក់ និងជាសះស្បើយ ៨០ ៧៦៦នាក់។ ចិនឈរក្នុងលំដាប់លេខ៥២ នៃប្រទេសមានអ្នកឆ្លងកូវីដ-១៩ច្រើនជាងគេ នៅលើពិភពលោក៕