រដ្ឋធានីប៉េកាំង៖ និស្សិតជាជនជាតិចិនម្នាក់ ត្រឡប់ពីសិក្សា នៅ ប្រទេស អង់គ្លេស ហើយធ្វើដំណើរទៅលេងប្រទេសកំណើត ចំពេលផ្ទុះការរាតត្បាត នៃកូវីដ-១៩ ធ្វើឲ្យឪពុកម្ដាយ មិនចង់ឲ្យកូនវិលត្រឡប់ទៅវិញ ហើយ នាំគ្នារារាំង តែកូនអកតញ្ញូមិនស្ដាប់តាមដំបូន្មានរបស់អ្នកមានគុណ ក៏បង្កឲ្យកើតជាជម្លោះ រហូតហ៊ានលើកដៃសម្លាប់ពួកគាត់ រួចរត់គេចខ្លួនមកស្រុកខ្មែរ តែអស់លក្ខណ៍ ត្រូវសមត្ថកិច្ចចាប់បញ្ជូនត្រឡប់ទៅវិញ ហើយអាចប្រឈមមុខនឹងការកាត់ទោសប្រហារជីវិត ប្រសិនបើតុលាការចិនរកឃើញទោសកំហុសដូចការចោទប្រកាន់មែន។
បើតាមសារព័ត៌មានអង់គ្លេស Daily Mail បានផ្សាយ កាលពីថ្ងៃទី៣០ ខែកញ្ញា ឆ្នាំ២០២០ ថា និស្សិតបរទេសជាជនជាតិម្នាក់ ឈ្មោះ Huang Mouyang អាយុ២២ឆ្នាំ បានមកសិក្សា នៅក្នុងប្រទេសអង់គ្លេស។ លុះក្រោយពេលសម្រាកពីការសិក្សា និស្សិតម្នាក់នេះបានធ្វើដំណើរទៅលើឪពុកម្ដាយ នៅក្នុងប្រទេសចិន។ ប៉ុន្ដែនៅក្នុងអំឡុងពេលការផ្ទុះឡើង នៃកូវីដ-១៩នេះ និស្សិតរួបនេះចង់វិលត្រឡប់មកកាន់ប្រទេសអង់គ្លេសវិញ តែឪពុកម្ដាយឃាត់ឃាំង ព្រោះខ្លាចកូនឆ្លងជំងឺដ៏កាចសាហាវនេះ។ ដោយសារតែការឃាឃាំងរបស់របស់ឪពុកម្ដាយ ទើបធ្វើឲ្យនិស្សិតរូបនេះផ្ទុះកំហឹងឡើង ហើយសម្លាប់ពួកគាត់ទាំង២នាក់។
ប្រភពព័ត៌មានដដែល បានបន្ដថា ក្រោយពេលធ្វើសកម្មភាពរួចហើយ ជនសង័្សយបានរត់គេចខ្លួន មកកាន់ប្រទេសកម្ពុជា ដើម្បីសំងំលាក់ខ្លួន។ លុះមកដល់ថ្ងៃទី១៧ ខែសីហា ឆ្នាំ២០២០ សមត្ថកិច្ចកម្ពុជាបានឃាត់ខ្លួនជនអន្ដោប្រវេសន៍ខុសច្បាប់ នៅក្នុងរាជធានីភ្នំពេញ ក៏ប៉ះចំលើជនសង័្សយ ហើយបញ្ជូនទៅកាន់ប្រទេសចិនវិញ តាមជើងហោះហើរលេខ CZ8314 កាលពីថ្ងៃទី២៩ ខែកញ្ញា ឆ្នាំ២០២០។
ប្រភពព័ត៌មានដដែល បានបន្ដថា ជនសង័្សយ មានឪពុកជាមេធាវី និងម្ដាយជាសាស្រ្ដាចារ្យ។ រីឯជនរងគ្រោះទាំង២នាក់ប្ដីប្រពន្ធ ត្រូវគេប្រទះឃើញស្លាប់ នៅក្នុងអន្ដេវាសិកដ្ឋាន នៃសាលារៀនមួយ នៅក្នុងទីក្រុង Nanning នាភាគខាងត្បូងតំបន់ស្វយ័ត Guangxi Zhuang កាលពីថ្ងៃទី១០ ខែសីហា ឆ្នាំ២០២០។
ជាមួយគ្នានេះដែរ អាជ្ញាធរចិន បានបញ្ជាក់ថា ការស្លាប់របស់ជនរងគ្រោះទាំង២នាក់នេះ សមត្ថកិច្ចចិនដាក់ការសង័្សយទៅលើកូនប្រុសរបស់ពួកគេ។ ប្រសិនបើតុលាការរកឃើញជនសង័្សយ ពិតជាបានប្រព្រឹត្ដទោសកំហុស ដូចការចោទប្រកាន់នេះមែន ជនសង័្សយអាចប្រឈមមុខនឹងទោសប្រហារជីវិត៕
