រដ្ឋធានីសេអ៊ូល៖ ក្រោយការសម្លាប់ និងដុតកម្ទេច សាកសព មន្រ្ដីជលផល កូរ៉េខាងត្បូង ហើយមេដឹកនាំ គីម ជុងអ៊ុន បានចេញមុខសុំទោសកូរ៉េខាងត្បូងបាន ជំរុញឲ្យរដ្ឋាភិបាលទីក្រុងព្យុងយ៉ាង បើកការស៊ើបអង្កេតលើករណីនេះ។
ការិយាល័យប្រធានាធិបតីកូរ៉េខាងត្បូង លោក មូន ចេអ៊ីន បានប្រកាស នៅថ្ងៃទី២៦ ខែកញ្ញា ឆ្នាំ២០២០ថា រដ្ឋាភិបាលទីក្រុងសេអ៊ូល នឹងស្នើឱ្យកូរ៉េខាងជើង បើកការស៊ើបអង្កេតរួមគ្នាមួយ ជុំវិញការបាញ់សម្លាប់មន្ត្រីជលផលរបស់កូរ៉េខាងត្បូង ហើយកម្ទេចសាកសពនោះ។
បើតាមសារព័ត៌មាន CAN បានចេញផ្សាយ នៅរសៀល ថ្ងៃទី២៦ ខែកញ្ញា ឆ្នាំ២០២០ ថា រឿងរ៉ាវដ៏រស៊ើបខាងលើនេះ បក្សប្រឆាំង និងសាធារណមតិបានដាក់សម្ពាធយ៉ាងខ្លាំង មកលើរដ្ឋាភិបាលរបស់លោកប្រធានាធិបតីកូរ៉េខាងត្បូង មូន ចេអ៊ីន។ ការិយាល័យប្រធានាធិបតីកូរ៉េខាងត្បូង បានប្រកាសបែបនេះ បន្ទាប់ពីកិច្ចប្រជុំក្រុមប្រឹក្សាសន្តិសុខជាតិ កាលពីយប់ម្សិលមិញ។
កូរ៉េខាងត្បូង បានចោទរដ្ឋាភិបាលទីក្រុងព្យុងយ៉ាងថា កងទ័ពកូរ៉េខាងជើង បានបាញ់សម្លាប់មន្រ្តីជលផលម្នាក់របស់ខ្លួន ខណ:ព្យាយាមរត់ចូលកូរ៉េខាងជើង។ ប៉ុន្ដែក្រោយពេលបាញ់សម្លាប់មន្រ្ដីជលផលកូរ៉េខាងត្បូង រួចហើយ កងទ័ពរបស់កូរ៉េខាងជើង ថែមដុតកម្ទេចសាកសពចោលបន្ថែមទៀត ដែលនេះជាទង្វើដ៏ព្រៃផ្សៃបំផុត មិនអាចអត់ឱនឲ្យបានឡើយ។
ក្រោយពេលមានឧបទ្ទវហេតុបែបនេះ មេដឹកនាំផ្ដាច់ការកូរ៉េខាងជើង លោក គីម ជុងអ៊ុន បានចេញមុខសុំទោសដល់ប្រធានាធិបតីកូរ៉េខាងត្បូង និងប្រជាពលរដ្ឋរបស់ប្រទេសនេះផងដែរ។ លោក គីម ជុងអ៊ុន បានហៅហេតុការណ៍នោះថា ជារឿងដ៏អកុសល មិននឹកស្មានដល់។ នេះជាការចេញមុខសុំទោសដ៏កម្ររបស់មេដឹកនាំកូរ៉េខាងជើង។
បើតាមមេបញ្ជាការអាមេរិក ប្រចាំនៅកូរ៉េខាងត្បូង បានឲ្យដឹងថា មេដឹកនាំកូរ៉េខាងជើង មានការពួ្រយបារម្ភយ៉ាងខ្លាំង អំពីការឆ្លងកូវីដ១៩ ឆ្លងរាតត្បាត នៅក្នុងប្រទេសរបស់ខ្លួន ថ្វីបើពេលនេះ មិនទាន់មានរបាយការណ៍អំពីការឆ្លងក្ដី។ ដោយសារតែបញ្ហានេះ ទើបមេដឹកនាំកូរ៉េខាងជើង ចេញបញ្ជាឲ្យកងទ័ពបាញ់សម្លាប់អ្នកឆ្លងដែនចូលមកក្នុងប្រទេសកុម្មុយនីស្ដមួយនេះ៕