រាជធានីបាងកក៖ ស្ថាប័នឱសថរបស់រដ្ឋាភិបាលថៃ ហៅកាត់ (GPO) បានចុះហត្ថលេខាលើអនុស្សរណ:លើការយោគយល់គ្នាជាមួយនឹងស្ថាប័ន PTT សាងសង់រោងចក្រផលិតឱសថ សម្រាប់ប្រឆាំងនឹង ជំងឺមហារីក គ្រប់ ប្រភេទ ហើយវានឹងមានភាពងាយស្រួលដល់អ្នកជំងឺ ព្រោះវាមាតម្លៃថោក ជាងពាក់កណ្ដាល នៃតម្លៃឱសថបច្ចុប្បន្ន។
លោក Anutin Charnvirakul រដ្ឋមន្រ្ដីក្រសួងសុខាភិបាលសាធារណ: បានថ្លែងថា មហារីកជាជំងឺរ៉ាំរ៉ៃដ៏សាហាវបំផុតមួយ។ ជំងឺនេះនាំឲ្យមានអត្រាស្លាប់ខ្ពស់បំផុត នៅក្នុងរយ:ពេល២ទសវត្សរ៍ កន្លងមកនេះ។ ជារៀងរាល់ឆ្នាំ នៅក្នុងប្រទេសថៃ មានអ្នកស្លាប់ ដោយសារជំងឺមហារីក កើនឡើងជាង ៨០ ០០០នាក់។ រីឯការចំណាយលើការព្យាបាលជំងឺដ៏កាចសាហាវនេះ មានតម្លៃខ្ពស់ណាស់ បើធៀបនឹងការព្យាបាលជំងឺផ្សេងៗ។
លោករដ្ឋមន្រ្ដីក្រសួងសុខាភិបាលសាធារណ: បានបញ្ជាក់ថា ជារៀងរាល់ឆ្នាំ ប្រទេសថៃបានចំណាយថវិកាលើការព្យាបាលជំងឺនេះ អស់រហូតដល់ជាង២១ពាន់លានបាត (លុយថៃ) ឬស្មើនឹង ៦៦៦ ១៥៩ ៥៩៨ដុល្លារអាមេរិក។ ប៉ុន្ដែប្រសិនបើយើងផលិតថ្នាំព្យាបាលជំងឺមហារីកគ្រប់ប្រភេទ នៅក្នុងប្រទេសថៃវិញ យើងនឹងអាចកាត់បន្ថយលើការទិញឱសថ រហូតដល់ទៅ៥០ភាគរយ។
ជាមួយគ្នានេះ លោក Supattanapong Punmeechaow រដ្ឋមន្រ្ដីក្រសួងថាមពល បានថ្លែងថា ការលើកកម្ពស់ការស្រាវជ្រាវ និងការផលិតឱសថនានា នៅក្នុងប្រទេស គឺសមស្របតាមទិសដៅរបស់ប្រទេសជាតិ ក្នុងគោលដៅអភិវឌ្ឍន៍សេដ្ឋកិច្ចបៃតង វិលជុំ និងជីវសាស្រ្ដ។ នៅពេលមានឧស្សាហកម្មវេជ្ជសាស្ដ្រដ៏ទូលំទូលាយ វានឹងដើរតួនាទីដ៏សំខាន់ ក្នុងការធ្វើឱ្យប្រទេសថៃ ក្លាយជាមជ្ឈមណ្ឌល សម្រាប់សុខាភិបាល និងជីវវិទ្យាសាស្ត្រកាន់តែប្រសើរជាងមុន។
លោករដ្ឋមន្រ្ដី បានបន្ថែមថា រោងចក្រផលិតឱសថប្រឆាំងនឹងជំងឺមហារីកគ្រប់ប្រភេទនេះ នឹងសាងសង់ នៅក្នុងតំបន់ឧស្សាហកម្ម Wanarom ស្ថិតក្នុងខេត្ដ Rayong ដែលស្ថិតនៅឆ្នេរភាគខាងកើត នៃឈូងសមុទ្រថៃ។ សំណង់រោងចក្រនេះ នឹងចំណាយពេលសាងសង់១៤ខែ ហើយត្រូវគេរំពឹងថា នឹងសាសង់រួចរាល់ នៅឆ្នាំ២០២២ខាងមុខនេះ៕