រដ្ឋធានីសេអ៊ូល៖ ក្រោយពេលប្រធានាធិបតីកូរ៉េខាងត្បូង បានខឹងសម្បាលើករណីបាញ់សម្លាប់មន្រ្ដីជលផលរបស់ខ្លួន ហើយកងទ័ពរបស់ប្រទេសនេះត្រៀមលក្ខណ:ធ្វើសង្រ្គាមជាមួយនឹងប្រទេសជាបងប្អូននោះមក មេដឹកនាំកូរ៉េខាងជើង បានចេញមុខសុំទោសដ៏កម្រ ចំពោះឧបទ្ទវហេតុនេះ។
ការិយាល័យប្រធានាធិបតីកូរ៉េខាងត្បូង បានឲ្យដឹងថា មេដឹកនាំកូរ៉េខាងជើង លោក គីម ជុងអ៊ុន នៅថ្ងៃទី២៥ ខែកញ្ញា ឆ្នាំ២០២០នេះ បានចេញសារសុំទោសដ៏កម្រមួយ លើអ្វីដែលមេដឹកនាំកូរ៉េខាងជើង បានពិពណ៌នាថា នេះជាការសម្លាប់មួយ ដោយមិនបានគិតទុកជាមុន និងគួរឱ្យអាម៉ាស់បំផុត ចំពោះការសម្លាប់លើមន្រ្ដីកូរ៉េខាងត្បូង នៅឯសមុទ្រ ជិតព្រំដែន រវាងប្រទេសទាំង២។
នៅមុនពេលមេដឹកនាំកូរ៉េខាងជើងសុំទោសនេះ លោក មូន ជេអ៊ីន ប្រធានាធិបតីកូរ៉េខាងត្បូង បានថ្លែងថា មន្ត្រីទទួលបន្ទុកដែនសមុទ្រ និងនេសាទកូរ៉េខាងត្បូងម្នាក់ ត្រូវបានទាហានកូរ៉េខាងជើង បាញ់សម្លាប់ និងដុតកម្ទេចសាកសព ហើយនេះជាអំពើដ៏ព្រៃផ្សៃ មិនអាចទទួលយកបានឡើយ។
លោក Kang Min Seok អ្នកនាំពាក្យវិមានប្រធានាធិបតីកូរ៉េខាងត្បូង បានថ្លែង កាលពីថ្ងៃទី២៤ ខែកញ្ញា ឆ្នាំ២០២០ ថា កូរ៉េខាងត្បូងអំពាវនាវឲ្យទីក្រុងព្យុងយ៉ាង ទទួលខុសត្រូវ ពាក់ព័ន្ធនឹងមន្ត្រីកូរ៉េខាងត្បូង ដែលត្រូវទាហានកូរ៉េខាងជើងបាញ់សម្លាប់ នៅតំបន់សមុទ្រព្រំដែន រវាងប្រទេសទាំងពីរ។ ជាមួយគ្នានេះ ប្រធានាធិបតី មូន បានស្នើដល់កម្លាំងទាហានបង្កើនការរក្សាសន្តិសុខ ការពារអាយុជីវិតរបស់ខ្លួន និងសុវត្ថិភាពរបស់ពលរដ្ឋកូរ៉េខាងត្បូងទាំងមូល។
ប្រភពព័ត៌មានពីកូរ៉េខាងត្បូង បានឲ្យដឹងថា មន្រ្ដីកូរ៉េខាងត្បូងដែលរាយការណ៍បាត់ខ្លួនពីទូកល្បាតបទល្មើសនេសាទនោះ គឺមានចម្ងាយប្រហែល១០គីឡូម៉ែត្រភាគខាងត្បូង នៃខ្សែបន្ទាត់កំណត់ព្រំដែនកូរ៉េខាងជើង។ នៅចំណុចនោះតែងតែមានជម្លោះលើការគ្រប់គ្រងខាងយោធា រវាងប្រទេសបងប្អូនទាំង២នេះ។
មេបញ្ជាការកងទ័ពអាមេរិក ប្រចាំនៅកូរ៉េខាងត្បូង បានថ្លែងថា កងទ័ពកូរ៉េខាងជើង ទទួលបទបញ្ជា «បាញ់សម្លាប់» អ្នកឆ្លងដែនចូលមកក្នុងប្រទេសកូរ៉េខាងជើង ដើម្បីការពារកូវីដ១៩៕