រាជធានីបាងកក៖ បុរសម្នាក់បានបើករថយន្ដស៊េរីទំនើប ដឹកប្រពន្ធបោះពួយយ៉ាងលឿន ជ្រុលចង្កូតទៅបុកទ្រូងផ្លូវ ហើយបន្ដទៅបុកដើមឈើមួយដើមទៀត បណ្ដាលឲ្យស្លាប់ខ្លួនឯងយ៉ាងអាណោចអាធ័ម ហើយប្រពន្ធរងរបួសធ្ងន់ កាលពីវេលាម៉ោង៤ព្រឹក ថ្ងៃទី២៥ ខែកញ្ញា ឆ្នាំ២០២០ នៅតាមផ្លូវ Thep Krasattri ស្ថិតក្នុងស្រុក Thalang ខេត្តភូកេត ប្រទេសថៃ។
លោកវរសេនីយ៍ Kittiphum Thinthalang មន្រ្ដីស៊ើបអង្កេតស្រុក Thalang បានឲ្យដឹងថា មុនពេលកើតមាននូវគ្រោះថ្នាក់ចរាចរណ៍នោះ ជនរងគ្រោះបានបើករថយន្ដ ម៉ាក Mercedes Benz ដឹកប្រពន្ធតាមបណ្ដោយផ្លូវThep Krasattri ។ លុះមកដល់ចំណុចកើតហេតុ ទំនងជាអ្នកបើកបរបាត់បង់ម្ចាស់ការ ទើបធ្វើឲ្យរថយន្ដជ្រុលទៅបុកទ្រុងផ្លូវ ហើយបន្ដទៅបុកដើមឈើមួយដើមទៀត បណ្ដាលឲ្យអ្នកបើកបរស្លាប់ និងប្រពន្ធរបស់គាត់រងរបួស។
លោកវរសេនីយ៍ បានបន្ដថា ជនរងគ្រោះ ឈ្មោះ Chamnan Chaileum អាយុ៥៦ឆ្នាំ (ស្លាប់) និងប្រពន្ធ ឈ្មោះ Sunee Phudbua ។ ពួកគេទាំង២នាក់ រស់នៅស្រុក Muang ខេត្តភូកេត។ បើតាមការពិនិត្យ នៅកន្លែងកើតហេតុ គេអាចសន្និដ្ឋានបានថា ជនរងគ្រោះបានបើករថយន្ដ នៅក្នុងល្បឿនលឿន។
ទោះជាយ៉ាងណា ប៉ូលិសថៃនៅតែបន្ដស៊ើបអង្កេតលើករណីគ្រោះថ្នាក់ចរាចរណ៍នេះបន្ថែមទៀត៕