រដ្ឋធានីហាណូយ៖ ក្រុមអ្នកជំនាញ បានយល់ឃើញថា នាយករដ្ឋមន្រ្ដីថ្មីរបស់ប្រទេសជប៉ុន នឹងបន្ដការគាំទ្ររបស់ជប៉ុនដល់ការបើកចំហដែនសមុទ្រ និងសេដ្ឋកិច្ច ហើយគោលនយោបាយនេះ នឹងជំរុញឲ្យទំនាក់ទំនងរវាងជប៉ុន និងវៀតណាម កាន់តែជិតស្និទ្ធឡើងបន្ថែមទៀត។
លោកស្រី Christina Davis សាស្រ្ដចារ្យរបស់រដ្ឋាភិបាល និងជានាយកកម្មវិធី ស្ដីពីទំនាក់ទំនងអាមេរិក-ជប៉ុន នៅឯសាកលវិទ្យាល័យហាវើដ (Harvard) បានថ្លែងថា ក្រោយពេលនាយករដ្ឋមន្រ្ដីថ្មីរបស់ប្រទេសជប៉ុនឡើងកាន់តំណែង នឹងមាននិរន្ដរភាព នៅក្នុងការប្ដេជ្ញាចិត្ដរបស់រដ្ឋាភិបាល ចំពោះសម្ពន្ធមិត្ត រវាងអាមេរិក-ជប៉ុន ហើយតំបន់ឥណ្ឌូ-ប៉ាស៊ីហ្វិក នឹងមានសេរីភាព ហើយបើកចំហផងដែរ។ អ្វីដែលលោក Yoshihide Suga ធ្វើ គឺក្នុងនាមជានាយករដ្ឋមន្រ្ដី ដែលនឹងអាចធ្វើឲ្យទំនាក់ទំនង រវាងជប៉ុន និងវៀតណាម កាន់តែរឹងមាំថែមទៀត។
លោក Yoshihide Suga វ័យ៧១ឆ្នាំ បានក្លាយជានាយករដ្ឋមន្រ្ដីថ្មីរបស់ជប៉ុន នៅថ្ងៃទី១៦ ខែកញ្ញា ឆ្នាំ២០២០ ក្រោយពេលទទួលបានការទុកចិត្តពីរដ្ឋសភាជប៉ុន។ លោក Suga ឋស៊ីនហ្ស៊ូ អាបេ (Shinzo Abe) ដែលបានប្រកាសលាលែងពីតំណែង ដោយសារបញ្ហាសុខភាព។ លោក Suga ត្រូវបានគេចាត់ទុកថា ជាដៃស្ដាំរបស់លោក អាបេ ដោយលោកបំពេញការងារជាប្រធានលេខាធិការគណ:រដ្ឋមន្រ្ដី អស់រយ:ពេល៨ឆ្នាំកន្លងមកហើយ នៅក្នុងរដ្ឋាភិបាលរបស់លោកអាបេ។
លោកស្រីសាស្រ្ដាចារ្យ បានបញ្ជាក់ថា ជប៉ុនបានបង្ហាញពីការបង្កើនភាពជាអ្នកដឹកនាំ នៅក្នុងតំបន់ ដើម្បីគាំទ្រដល់ការបើកចំហដែនសមុទ្រនានា និងសេដ្ឋកិច្ច ប្រឆាំងនឹងបញ្ហាប្រឈមនានា។ ករណីនេះនឹងជំរុញឲ្យជប៉ុន និងវៀតណាម ក្លាយជាដៃគូដ៏ជិតស្និទ្ធ។ ជាមួយគ្នានេះ នាយករដ្ឋមន្រ្ដីថ្មីរបស់ជប៉ុន នឹងបន្ដគាំទ្រដល់សិទ្ធិសេរីភាព នៅក្នុងការធ្វើនាវាចរណ៍ នៅក្នុងដែនសមុទ្រចិនខាងត្បូង ហើយសមុទ្រអន្ដរជាតិនានា ត្រូវតែបើកចំហ សម្រាប់ជប៉ុន និងវៀតណាម នាំឲ្យមានទំនាក់ទំនង រវាងកងទ័ព នៃប្រទេសទាំង២។ យុទ្ធសាស្រ្ដការទូតនេះ គាំទ្រដល់ច្បាប់អន្ដរជាតិ ដែលជាកត្ដាដ៏សំខាន់បំផុតមួយ។
ភាពតានតឹង នៅសមុទ្រចិនខាងត្បូង បានកើតឡើង ក្រោយពេលរដ្ឋាភិបាលទីក្រុងប៉េកាំងបានអះអាង អំពីភាគច្រើន នៃដែនសមុទ្រចិនខាងត្បូង ប្រហែល៨០ភាគរយ ស្ថិតក្នុងដែនអធិបតេយ្យភាពរបស់ខ្លួន។ ការអះអាងរបស់ចិន បង្កឲ្យមានជម្លោះជាមួយនឹងបណ្ដាប្រទេស នៅក្នុងតំបន់អាស៊ាន រួមមាន ប៊្រុយណេ ម៉ាឡេស៊ី ហ្វីលីពីន និងវៀតណាម។ ជម្លោះសមុទ្រចិនខាងត្បូងនេះ បានរាលដាលនាំឲ្យមានការប្រឈមមុខដាក់គ្នា កាន់តែខ្លាំងឡើង រវាងអាមេរិក និងចិន។
សមុទ្រចិនខាងត្បូង មានទំហំ៣,៥លានគីឡូម៉ែត្រការ៉េ សម្បូរទៅដោយជីវ:ចម្រុះ ឧស្ម័ន ហ្គាស និងរ៉ែផ្សេងៗទៀត។ រីឯការធ្វើពាណិជ្ជកម្មឆ្លងកាត់សមុទ្រចិនខាងត្បូងនេះ មានទំហំទឹកប្រាក់ រហូតដល់៣ពាន់កោដិលានដុល្លារអាមេរិក ក្នុងមួយឆ្នាំៗ។ ដោយសារតែបញ្ហានេះ ទើបចិនចង់វាតទីត្រួតត្រា នៅលើដែនសមុទ្រចិនខាងត្បូងទាំងមូល៕