រាជធានីបាងកក៖ វិស្វករយន្ដហោះម្នាក់ បានបើករថយន្ដបោះពួយយ៉ាងលឿន ជ្រុលចង្កូតទៅបុករបាំងដែក បណ្ដាលឲ្យស្លាប់ខ្លួនឯង កាលពីវេលាម៉ោង៣រសៀល ថ្ងៃទី២៣ ខែកញ្ញា ឆ្នាំ២០២០ នៅតាមផ្លូវ Chalerm Maha Nakhon ស្ថិតក្នុងខណ្ឌ Pathumwan ទីក្រុងបាងកក។
ប្រភពព័ត៌មាន បានឲ្យដឹងថា មុនពេលកើតហេតុ ជនរងគ្រោះបានបើករថយន្ដ BMW 523i បោះពួយយ៉ាងលឿនតាមបណ្ដោយផ្លូវល្បឿន ចេញពីតំបន់ពី Chalerm Maha Nakhon ឆ្ពោះទៅកាន់ Dao Khanong ។ ប៉ុន្ដែជាអកុសល រថយន្ដបើករេចង្កូតទៅបុករបាំងដែក ខ្ទាតចេញពីរថយន្ដ បណ្ដាលឲ្យស្លាប់យ៉ាងអាណោចអាធម័ និងរថយន្ដខូចខាតយ៉ាងដំណំ។
លោក Patarapol Muanthom អាយុ២៨ឆ្នាំ បានឲ្យដឹងថា គាត់បានប្រាប់ប្អូនប្រុសឲ្យទៅពិនិត្យមើលការងាររកស៊ី នៅក្នុងតំបន់ Thong Lor ក្រោយចេញពីធ្វើការ។ ប៉ុន្ដែនៅពេលគេត្រឡប់មកផ្ទះនៅ Thung Khru វិញ ស្រាប់តែប្អួនជួបនឹងគ្រោះអកុសលបែបនេះតែម្ដង។
លោកវរសេនីយ៍ Chatchai Iam-ong បានឲ្យដឹងថា ជនរងគ្រោះ ឈ្មោះ Thitikul Muanthom អាយុ២៥ឆ្នាំ មុខរបរជាវិស្វករយន្ដហោះ។ ជនរងគ្រោះបានស្លាប់ ក្រោយពេលបញ្ជូនទៅកាន់មន្ទីរពេទ្យ Chulalongkorn ។ ករណីនេះ បណ្ដាលមកពីជនរងគ្រោះបើកបរក្នុងល្បឿនលឿនពេក។
ក្រោយពេលកើតហេតុ ក្រុមសង្រ្គោះ និងវេជ្ជបណ្ឌិត នៃមន្ទីរពេទ្យ Chulalongkorn បានមកកាន់កន្លែងកើតហេតុ ហើយឃើញសាកសពរបស់អ្នកបើករថយន្ដ ខ្ទាតចេញក្រៅរថយន្ដ៕