រដ្ឋធានីហាណូយ៖ ស្រ្ដីជនជាតិវៀតណាមម្នាក់ ត្រូវបានអ្នកជិតខាង បញ្ឆោតទៅកាន់ប្រទេសចិន ហើយបង្ខំឲ្យលក់ខ្លួន និងបញ្ជូនមកកាន់ប្រទេសកំណើត ដើរអូសទាញនារីវៀតណាមចំនួន៦នាក់ ទៅបង្ខំឲ្យធ្វើជាស្រីពេស្យា នៅក្នុងប្រទេសចិន ក៏ត្រូវបានតុលាការ សម្រេចផ្ដន្ទាទោស ដាក់ពន្ធនាគារ រយ:ពេល៦ឆ្នាំ។
សារព័ត៌មានវៀតណាម VnExpress បានផ្សាយថា ជនជាប់ចោទ ឈ្មោះ Vo Thi Quyen ភេទស្រី អាយុ៣៤ឆ្នាំ រស់នៅក្រុង Song Doc ស្ថិតនៅតាមដីសណ្ដមេគង្គ នៃខេត្ត Ca Mau ។ ស្រ្ដីរូបនេះត្រូវបានតុលាការខេត្ដ Ca Mau ចោទប្រកាន់ពីការជួញដូរមនុស្ស ដោយនាំស្រ្ដីជនជាតិវៀតណាម ចំនួន៦នាក់ ទៅកាន់ប្រទេសចិន ដើម្បីបង្ខំឲ្យពួកនាងទៅធ្វើជាស្រីពេស្យា នៅទីនោះ។
ប្រភពព័ត៌មានដដែល បានបន្ដថា ជនជាប់ចោទ ក៏ជាជនរងគ្រោះផងដែរ ព្រោះនាងត្រូវបានបុរសម្នាក់ជាអ្នកជិតខាងបោកបញ្ឆោត នាំទៅលក់ និងបង្ខំឲ្យធ្វើជាស្រ្ដីរកស៊ីផ្លូវភេទ នៅក្នុងខេត្តយុនណាន ប្រទេសចិន កាលពីអំឡុងឆ្នាំ២០០២។ លុះក្រោយមក បុរសវៀតណាមម្នាក់នោះក៏បានបញ្ជូននាងឲ្យមកកាន់ប្រទេសកំណើតវិញ ហើយដើរអូសទាញស្រ្ដីវៀតណាម នាំទៅកាន់ប្រទេសចិន ដើម្បីបង្ខំឲ្យលក់ខ្លួន។ ប៉ុន្ដែទីបំផុត នាងក្លាយជាអ្នកទោស ជាប់គុកច្រវាក់ ដោយសារការដើរអូសទាញនារីវៀតណាម នាំទៅលក់ខ្លួន នៅក្នុងប្រទេសចិន៕
