ទូកមួយគ្រឿងដឹកជនអន្ដោប្រវេសន៍ជិត៦០នាក់ បានលិច នៅខាងត្បូងកោះ Crete ប្រទេសក្រិក បានបណ្ដាលឲ្យមានមនុស្ស៣នាក់ស្លាប់ និង៥៣នាក់ត្រូវបានសង្រ្គោះ ឲ្យរួចផុតពីគ្រោះថ្នាក់។
ឆ្មាំសមុទ្រក្រិក បានឲ្យដឹងថា ការលិចទូកដឹកជនអន្ដោប្រវេសន៍នេះ បានកើតឡើង កាលពីថ្ងៃទី១៤ ខែកញ្ញា ឆ្នាំ២០២០ នៅភាគខាងត្បូងកោះ Crete ប្រទេសក្រិក។ នៅក្នុងហេតុការណ៍នោះ មានមនុស្ស៣នាក់ស្លាប់ ក្នុងនោះមានកុមារ២នាក់ និងស្រ្ដីម្នាក់។ ដោយឡែកមនុស្សចំនួន៥៣នាក់ផ្សេងទៀត បានជួយសង្រ្គោះទាន់ពេលវេលា។
ទោះជាយ៉ាងណា ឆ្មាំសមុទ្រប្រទេសក្រិក បានអះអាងថា ពួកគេមិនទាន់ដឹងថា ទូកនេះជិះគ្នាប៉ុន្មាននាក់ ហើយមានមនុស្សប៉ុន្មាននាក់កំពុងបាត់ខ្លួននោះដែរ។ ដោយឡែកជនរងគ្រោះដែលត្រូវបានសង្រ្គោះទាំង៥៣នាក់នោះ នឹងដឹកតាមយន្ដហោះរបស់កងទ័ពជើងទឹកក្រិក បញ្ជូនទៅកាន់មន្ទីរពេទ្យ៕
