បាងកក ៖ នៅថ្ងៃទី៣១ សីហា ២០២០នេះ ប្រទេសថៃ សម្រេចពន្យារពេលទិញនាវាមុជទឹកចំនួន ២គ្រឿងពីប្រទេសចិន វិញក្នុងតម្លៃប្រមាណ ៧២៤លានដុល្លារ បន្ទាប់ពីមានកំហឹងជាសាធារណៈ ជុំវិញកិច្ចព្រមព្រៀងដ៏ចម្រូងចម្រាសនេះ ខណៈសេដ្ឋកិច្ចថៃ កំពុងតែជួបវិបត្តិដោយសារតែជំងឺកូវីដ-១៩ ។
សូមជម្រាបថា កិច្ចព្រមព្រៀងកាលពីឆ្នាំ២០១៥ ប្រទេសថៃចរចាទិញបរិក្ខារបស់កងទ័ពជើងទឹកពីប្រទេសចិន ហើយការចរចាបានបញ្ចប់នៅឆ្នាំ២០១៧ ដោយថៃ គ្រោងទិញនាវាមុជទឹកចំនួន៣គ្រឿង ក្នុងនោះមួយគ្រឿងដំបូង ត្រូវគេរំពឹងថា នឹងបញ្ជូនមកដល់ប្រទេសថៃ នៅឆ្នាំ២០២៣ ។
ទោះជាយ៉ាងណា ថៃក៏បានបញ្ជាទិញ២គ្រឿងបន្ថែមទៀត ក្នុងតម្លៃ ២២.៥ពាន់លានបាត (៧២៤លានដុល្លារ) ត្រូវបានអនុម័តកាលពីដើមខែសីហានេះ ដែលធ្វើឱ្យសាធារណជន មិនពេញចិត្ត នៅពេលដែលប្រទេសថៃ កំពុងតស៊ូ វិបត្តិសេដ្ឋកិច្ចដែលកំពុងធ្លាក់ចុះ ។ ប្រជាជនថៃ បានប្រើប្រព័ន្ធផ្សព្វផ្សាយសង្គមរិះគន់ កិច្ចព្រមព្រៀងនេះ ហើយបានលើកឡើងថា ថៃមិនត្រូវការនាវាមុជទឹកទេ ។
អ្នកនាំពាក្យរដ្ឋាភិបាល បានចេញប្រកាសនៅថ្ងៃចន្ទនេះថា លោកនាយករដ្ឋមន្ត្រី ប្រាយុទ្ធ ចាន់អូចា បានបញ្ជា មន្ត្រីជាប់ខ្ពស់កងទ័ពជើងទឹកថៃ ទៅចរចាជាមួយប្រទេសចិន ដើម្បីពន្យារពេលទិញនាវាមុជទឹក រយៈពេលមួយឆ្នាំទៀត ។
សេដ្ឋកិច្ចរបស់ប្រទេសថៃ កំពុងស្ថិតក្នុងដំណាក់កាលអាក្រក់បំផុត មិនធ្លាប់មានក្នុងរយៈពេលជាង២០ឆ្នាំ កន្លងមកនេះ ដោយបានធ្លាក់ចុះ ១២.២% នៅក្នុងត្រីមាសទី២ ដោយសារវិស័យទេសចរណ៍ និងបណ្តាវិស័យនានា បានរងផលប៉ះពាល់យ៉ាងខ្លាំងដោយសារជំងឺរាតត្បាតកូវីដ-១៩ ៕