រាជធានីភ្នំពេញ ៖ លោកបណ្ឌិត សុខ ទូច ប្រធានរាជបណ្ឌិត្យសភាកម្ពុជា បាននិយាយថា កម្ពុជាក៏អាចកសាងប៉ុស្តិ៍ជាសំណង់រឹងដូចវៀតណាមបានដែរ ប្រសិនបើវៀតណាមមិនព្រមរុះរើសំណង់ ដែលសាងសង់ចម្ងាយ១២០ម៉ែត្រពីព្រំដែនជាមួយកម្ពុជានោះទេ ។
លោកបណ្ឌិត សុខ ទូច បានលើកឡើងបែបនេះ ក្នុងកិច្ចពិភាក្សាតុមូលស្តីពី «តើកម្ពុជាត្រៀមខ្លួនយ៉ាងដូចម្ដេចសម្រាប់ថ្ងៃនេះនិងថ្ងៃស្អែក?» វេទិការាជបណ្ឌិត្យសភាកម្ពុជា នាព្រឹកថ្ងៃទី២៨ ខែសីហា ឆ្នាំ២០២០នេះ ។
លោកបណ្ឌិត សុខ ទូច ថ្លែងបន្តថា បច្ចុប្បន្នរដ្ឋាភិបាលបានបំពេញចំនុច៤សំខាន់ ក្នុងកិច្ចការពារបូរណភាពទឹកដី ដែលលោកថា ស្លាប់ទៅវិញក៏លោករីករាយដែរនេះជាមោទកភាពរបស់លោក ដែលរដ្ឋាភិបាលបានធ្វើ គឺបង្គោលព្រំដែន ដែលបន្សល់ទុកពីបារាំង ត្រូវរក្សាទុក ដើម្បីកុំឱ្យប្រវត្តិសាស្ត្រចារថា លោកនាយករដ្ឋមន្ត្រី ហ៊ុន សែន កាត់ដីឱ្យវៀតណាម ។ ដីនៅតាមព្រំដែន មិនត្រូវជួលឱបរទេស រួមទាំងការសាងសង់សំណង់រឹងណាមួយ ចម្ងាយ១៥០ម៉ែត្រពីខ្សែបន្ទាត់ព្រំដែន ត្រូវមានការឯកភាពពីប្រទេសទាំងពីរ ។ លោកបានបន្ថែមថា ការកសាងផ្លូវតាមព្រំដែនក៏ជាចំណុចសំខាន់មួយ ដែលធ្វើឱ្យលោកពេញចិត្តចំពោះរដ្ឋាភិបាលសព្វថ្ងៃផងដែរ ។
ជុំវិញករណីដែលវៀតណាមប្រែតង់ទៅជាសំណង់រឹង នៅតាមខ្សែបន្ទាត់ព្រំដែនថ្មីៗ លោកបានលើកឡើងថា កម្ពុជានឹងមានវិធានការបន្តបន្ទាប់ ដូចជាត្រូវធ្វើកំណត់ទូតសួរទៅភាគីវៀតណាម និងជម្រើសចុងក្រោយធ្វើប៉ុស្តិ៍ជាសំណង់រឹងទល់មុខគ្នា តាមខ្សែបន្ទាត់ព្រំដែនដូចវៀតណាមដែរ ។
លោកប្រធានរាជបណ្ឌិត្យសភាកម្ពុជា ថ្លែងយ៉ាងដូច្នេះថា «ទី២ បើវៀតណាម មិនស្តាប់! កម្ពុជាអង្វរម្តងទៀត ។ ទី៣ កម្ពុជាអាចធ្វើ១២០ម៉ែត្រទល់នឹងប៉ុស្តិ៍ហ្នឹងវិញ ។ អាប៉ុស្តិ៍ប៉ុណ្ណឹងថ្លៃប៉ុន្មាន ? អាហ្នឹងដូចគ្នា វៀតណាមធ្វើបាន កម្ពុជាក៏ធ្វើបានដែរ ។ រឿងអីទិញឡានអាតូយ៉ូតាល្អៗបាន ធ្វើតូបប៉ុណ្ណឹងមិនបាន ? យើងអត់ផ្ចាញ់ផ្ចាលទេ ប៉ុន្តែយើងបង្ហាញភាពស្មើគ្នាក្នុងប្រទេស អ្នកឯងធ្វើបាន កម្ពុជាក៏ធ្វើបានដែរ ។ អាតូបប៉ុណ្ណឹងធ្វើបាន ប៉ុន្តែយើងធ្វើក្រោយវា» ៕