រាជធានីភ្នំពេញ ៖ លោកលី តៅ Li Tao ប្រធានក្រុមប្រឹក្សាភិបាល ក្រុមហ៊ុន Union Development អភិវឌ្ឍន៍អាកាសយានដ្ឋានអន្តរជាតិតារាសាគរ ខេត្តកោះកុង បានអះអាងថា អាកាសយានដ្ឋានតារាសាគរ នឹងបញ្ចប់ការសាងសង់នៅដំណាក់កាលទី១ នៅចុងឆ្នាំ២០២០នេះ តាមគម្រោង និងផែនការរបស់ក្រុមហ៊ុន ។
ការអះអាងបែបនេះ ធ្វើឡើងក្នុងជំនួបសម្ដែងការគួរសម និងរាយការណ៍ការងារ ជូននាយឧត្តមសេនីយ៍ បណ្ឌិត ម៉ៅ ហាវណ្ណាល់ រដ្ឋមន្ត្រី ទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល នាព្រឹកថ្ងៃទី២៦ ខែសីហា ឆ្នាំ២០២០ នេះ ។
លោក លី បានរាយការណ៍អំពីវឌ្ឍនភាពការងារសាងសង់អាកាសយានដ្ឋានអន្តរជាតិ ដែលបានប្រព្រឹត្តទៅតាមផែនការ និងស្នើសុំគាំទ្រពីនាយឧត្តមសេនីយ៍ បណ្ឌិត ម៉ៅ ហាវណ្ណាល់ ដើម្បីបន្តជួយដល់គម្រោងសាងសង់បន្ថែមទៀត ។
នាយឧត្តមសេនីយ៍ បណ្ឌិត ម៉ៅ ហាវណ្ណាល់ បានអបអរសាទរចំពោះក្រុមហ៊ុន ដែលបានបញ្ចប់ការសាងសង់តាមផែនការ និងបន្តគាំទ្រសហការជាមួយក្រុមហ៊ុន ធ្វើយ៉ាងណាឲ្យការសាងសង់បញ្ចប់ដោយជោគជ័យ ក្នុងការចូលរួមចំណែកអភិវឌ្ឍន៍ប្រទេសកម្ពុជា ជំរុញកំណើនសេដ្ឋកិច្ច និងទាក់ទាញភ្ញៀវទេសចរ ។
សូមបញ្ជាក់ថា អាកាសយានដ្ឋានអន្ដរជាតិតារាសាគរ ស្ថិតក្នុងខេត្តកោះកុង ត្រូវបានគេដឹងថា មានទឹកប្រាក់វិនិយោគប្រមាណ ៣,៨ ពាន់លានដុល្លារអាម៉េរិក ស្ថិតក្រោមការសាងសង់ដោយក្រុមហ៊ុនចិនមួយឈ្មោះថា Union Development Group និងត្រូវបានវិនិយោគលើដីសម្បទានពីរាជរដ្ឋាភិបាលកម្ពុជា ដែលមានទំហំផ្ទៃដីសរុប ៤,៥ ម៉ឺនហិកតា ៕
