ខេត្តមណ្ឌលគិរី ៖ សមត្ថកិច្ចឃាត់ខ្លួនមនុស្ស ១៤នាក់ ក្នុងប្រតិបត្តិការបង្ក្រាបទីតាំងខារ៉ាអូខេមួយកន្លែង ដែលមានស្លាកយីហោ ប៊ីក្លឹប ស្ថិតនៅភូមិដោះក្រមុំ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ។
ប្រតិបត្តិការនេះ ធ្វើឡើងកាលពីវេលាម៉ោង០៩ និង៣៥នាទីយប់ ថ្ងៃទី២៥ ខែសីហា ឆ្នាំ២០២០ ដឹកនាំដោយលោកស្រីឧត្តមសេនីយ៍ត្រី ហួន គឹមហេង ស្នងការរងទទួលផែនប្រឆាំងការជួញដូរមនុស្ស និងការពារអនីតិជន និងកម្លាំងអធិការនគរបាលក្រុងសែនមនោរម្យ ។
បើតាមលោកស្រី ឧត្តមសេនីយ៍ត្រី ហួន គឹមហេង បានបញ្ជាក់ថា កម្លាំងនគរបាល បានលបឆ្មក់ចូលបង្ក្រាបជាក់ស្តែង ឃើញមាននារីបម្រើសេវាខាអូខេ មានចំនួន១៤នាក់ ក្នុងបន្ទប់ចំនួន០៥ និងរឹបអូសបានសម្ភារដែលបម្រើឱ្យសេវាខារាអូខេមួយចំនួន ។ ចំណែកស្ត្រីបម្រើសេវាខារ៉ាអូខេ គ្រាន់តែអប់រំណែនាំពន្យល់ហេតុផល នៃការប្រមូលផ្តុំ ប្រឈមនឹងការងាយឆ្លង កូវីដ-១៩ រួចក៏អោយទៅកន្លែងវិញ ។
លោកស្រី ឧត្ដមសេនីយ៍ត្រី ស្នងការង បានញ្ជាក់ថា ស្របពេល ដែលជំងឺកូវីដ-១៩ មិនទាន់ស្ងប់ស្ងាត់ ក្នុងប្រទេសកម្ពុជា គ្រប់សេវាកម្មខារ៉ាអូខេ ខ្លឹបកម្សាន្ត ដែលមានការប្រមូលផ្តុំ មនុស្សច្រើនទាំងអស់នៅក្នុងខេត្តមណ្ឌលគិរី ត្រូវផ្អាកសកម្មភាព ដើម្បីអនុវត្តទៅតាមការណែនាំរបស់រាជរដ្ឋាភិបាល និងក្រសួងសុខាភិបាល ក្នុងការទប់ស្កាត់ ការរីករាលដាលនៃជំងឺឆ្លង ៕