រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រី ហ៊ុន សែន បានបញ្ជាឲ្យលោក វ៉ា គឹមហុង ប្រធានគណៈកម្មាធិការចម្រុះ កិច្ចការព្រំដែនកម្ពុជា ចុះទៅជួបប្រជាពលរដ្ឋដែលអះអាងថា បាត់ដីនៅខេត្តត្បូងឃ្មុំ ក្រោយការបោះបង្គោលព្រំដែនជាមួយវៀតណាម ។
ជាមួយគ្នានេះដែរ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានណែនាំទៅកាន់ ឧបនាយករដ្ឋមន្ត្រី ប៊ិន ឈិន រដ្ឋមន្ត្រីទីស្ដីការគណៈរដ្ឋមន្ត្រី អោយបើកសិក្ខាសាលាមួយ ដើម្បីឲ្យប្រជាពលរដ្ឋ សិស្ស និស្សិតចូលស្តាប់ និងសួរអំពីរឿងព្រំដែន ។
ការលើកឡើងរបស់សម្តេចតេជោ ធ្វើឡើងក្នុងកិច្ចប្រជុំរបស់ឧត្តមក្រុមប្រឹក្សាពិគ្រោះ និងផ្តល់យោបល់ ដើម្បីបូកសរុបការងារឆមាសទី៤ នៅវិមានសន្តិភាព នាព្រឹកថ្ងៃទី២៥ ខែសីហា ឆ្នាំ២០២០នេះ ។
ជាមួយគ្នានេះ លោក ឈឹម ផលវរុណ បញ្ជាក់នៅក្រោយកិច្ចប្រជុំព្រឹកមិញថា បញ្ហាព្រំដែនជាប្រធានបទសំខាន់មួយនៅក្នុងការប្រជុំនោះ ។ លោកបានបញ្ជាក់ថា ប្រជាពលរដ្ឋណាដែលមានមន្ទិលរឿងព្រំដែនថា បាត់ដី សូមជួប និងបង្ហាញលោកទេសរដ្ឋមន្ត្រី វ៉ា គឹមហុង ដើម្បីស្រាវជ្រាវរកការពិត ។
លោក ឈឹម ផលវរុណ បានអោយដឹងថា នៅក្នុងកិច្ចប្រជុំដដែលនោះ សម្តេចនាយករដ្ឋមន្ត្រី បានបញ្ជាឲ្យគណៈរដ្ឋមន្ត្រីរៀបចំវេទិកា ដើម្បីទទួលប្រជាពលរដ្ឋ ចូលមកស្តាប់បទបង្ហាញលើការងារព្រំដែននេះផ្ទាល់ នៅទីស្តីការគណៈរដ្ឋមន្ត្រីផងដែរ ។ បញ្ហាព្រំដែននៅតែជារឿងរសើបក្នុងសង្គមកម្ពុជា ខណៈដែលការបោះបង្គោលព្រំដែនកម្ពុជានិងវៀតណាម បានជិតបញ្ចប់នៅសល់ប្រមាណ១៤%ទៀតប៉ុណ្ណោះ ។
សកម្មជនសិទ្ធិមនុស្ស អ្នកនយោបាយមួយចំនួន ដូចជាលោក រ៉ុង ឈុន ប្រធានសហភាពសហជីពកម្ពុជា និងលោក សួង សុភ័ណ្ឌ ប្រធានគណបក្សខ្មែរឈ្នះ ត្រូវបានចាប់ខ្លួន នៅក្នុងរយៈពេលចុងក្រោយនេះ និងត្រូវបានចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួន ជាបណ្តោះអាសន្ននៅពន្ធនាគារព្រៃស នៅក្រោមបទចោទញុះញង់ឱ្យមានការប្រព្រឹត្តបទឧក្រិដ្ឋជាអាទិ៍ បន្ទាប់ពីបានលើកឡើងពីបញ្ហាព្រំដែននេះ ៕
