ខេត្តកំពង់ស្ពឺ ៖ ប្រភពពីសាលាដំបូងខេត្តកំពង់ស្ពឺ នៅព្រលប់ថ្ងៃទី២៥ ខែសីហា ឆ្នាំ២០២០នេះ បានអោយដឹងថា បន្ទាប់ពីសាកសួររួច លោកស្រី ទិត្យ ដាលីន ចៅក្រមអមសាលាដំបូងខេត្តកំពង់ស្ពឺ បានសម្រេចចេញដីកាឃុំខ្លួន មន្ត្រីនគរបាល នៃអធិការដ្ឋាននគរបាលស្រុកសំរោងទង ខេត្តកំពង់ស្ពឺ ចំនួន៧នាក់ ដាក់ពន្ធនាគារខេត្តកំពង់ស្ពឺ ជាបណ្ដោះអាសន្ន ។
ក្រុមមន្ត្រីប៉ូលិសទាំង៧នាក់នោះ រួមមាន ៖ ១.លោកវរសេនីយ៍ទោ កង ភារី អធិការរងទទួលការងារសន្តិសុខ នៃអធិការដ្ឋាននគរបាលស្រុកសំរោងទង ជាអ្នកនាំអាទិ៍ (បាញ់២ដង ច្រើនគ្រាប់), ២. លោកអនុសេនីយ៍ឯក ដន សុខុម ឋានៈនាយរងផ្នែកសន្តិសុខ បាញ់ចំនួន២គ្រាប់, ៣.លោកអនុសេនីយ៍ត្រី ព្រីង ឡងឌី ឋានៈនាយរងប៉ុស្តិ៍វល្លិ៍ស បាញ់ចំនួន២គ្រាប់, ៤.លោកអនុសេនីយ៍ត្រី តាន់ សៅលី ឋានៈនាយរងផ្នែកគ្រឿងញៀន បាញ់ចំនួន២គ្រាប់, ៥.លោកអនុសេនីយ៍ត្រី ម៉ាន់ ប៊ុណ្ណារ៉ា ឋានៈនាយរងផ្នែកគ្រឿងញៀន បាញ់ចំនួន០២គ្រាប់, ៦.លោកព្រិន្ទបាលទោ ឌី សូភក្តិ ឋានៈមន្ត្រីប៉ុស្តិ៍ទំព័រមាស បាញ់ចំនួន០២គ្រាប់ និងលោក ម៉ាន់ ប៊ុណ្ណារែក ។
គួរបញ្ជាក់ថា លោក កង ភារី ហៅ អាខ្មៅ និង មន្ត្រីអធិការដ្ឋាន ៦នាក់ទៀត បានជួបជុំគ្នាផឹកស៊ី នៅសាលាស្រុក សំរោងទង ខេត្តកំពង់ស្ពឺ នៅថ្ងៃទី១៨-១៩ ខែសីហា ឆ្នាំ ២០២០ ពេលស្រវឹងក៏នាំគ្នាបាញ់បោះសេរី បង្កការភ្ញាក់ផ្អើលដល់ប្រជាពលរដ្ឋ ទើបប្រជាពលរដ្ឋរាយការណ៍ទៅស្នងការដើម្បីចាត់វិធានការ ។
បន្ទាប់ពីមានហេតុការណ៍បាញ់បោះសេរីជាបន្តបន្ទាប់មក ឯកឧត្ដមនាយឧត្ដមសេនីយ៍សន្តិបណ្ឌិត នេត សាវឿន បានបញ្ជាអោយស្នងការនគរបាលខេត្តកំពង់ស្ពឺ ឃាត់ខ្លួនកសាងសំណុំរឿងបញ្ជូនមន្ត្រីនគរបាលទាំង ៧នាក់ នេះទៅ អយ្យការអមសាលាដំបូងខេត្តកំពង់ស្ពឺ ដើម្បីចាត់ការតាមផ្លូវច្បាប់ ៕
