ខេត្តពោធិ៍សាត់ ៖ នៅថ្ងៃទី២៤ សីហា ២០២០ សង្កាត់រដ្ឋបាលជលផល កំពង់លួង ដឹកនាំដោយ លោក យូ សុវិចិត្រ សហការជាមួយកម្លាំងយោធា នៃតំបន់ប្រតិបត្ដិការសឹករង ខេត្ដពោធិ៍សាត់ បានចេញប្រតិបត្ដិការ បង្ក្រាបបទល្មើសនេសាទ ក្នុងបឹងទន្លេសាប នៃខេត្តពោធិសាត់ ចាប់ពីចំណុចឃុំក្បាលត្រាច រហូតដល់ភូមិកំពង់ថ្គោល ឃុំអន្សាចំបក់ ស្រុកក្រគរ ខេត្តពោធិ៍សាត់ ដែលជាលទ្ធផលបង្ក្រាបបាន ២ករណី និងបានរុះរើ និងបំផ្លាញឧបករណ៍នេសាទ ដែលជាវត្ថុតាង រួមមាន របាំងស្បៃមុង ៤ ប្រវែង ៨០០ម៉ែត្រ លូកងស្បៃមុង ចំនួន ៦មាត់ របាំងសាច់អួន ២ ប្រវែង ៧០០ ម៉ែត្រ ក្បាលបរ ចំនួន២គ្រឿង បង្គោលចំរឹង ចំនួន ៦០០ដើម និងបានចាក់លែង កូនត្រីចំរុះ ១៥គីឡូក្រាម ។
ដោយឡែក នៅខេត្តកំពង់ឆ្នាំងវិញ នៅថ្ងៃទី២៤ សីហា ២០២០ នេះដែរចាប់ពីវេលាម៉ោង៨និង៣០នាទីព្រឹក ដល់ម៉ោង០២និង៣០នាទីរសៀល កម្លាំងនគរបាលស្រុកកំពង់លែងចំនួន៣នាក់ ដឹកនាំដោយលោកវរសេនីយ៍ត្រី សៀង ប៊ុនសាន អធិការរង ទទួលការងារនគរបាលយុត្តិធម៌ សហការជាមួយកម្លាំងចម្រុះសរុបចំនួន ២៥នាក់ ក្នុងនោះរួមមាន ៖ ១-អភិបាលស្រុក ០១ នាក់, ២-ខណ្ឌរដ្ឋបាលជលផល ១២ នាក់, ៣-នគរបាលស្រុក ០៣ នាក់, ៤-កងរាជអាវុធហត្ថស្រុក ០៣ នាក់ និង៥-សហគមន៍ ០៦ នាក់ ។
ដឹកនាំរួមដោយ លោកលី ឡា នាយខណ្ឌរដ្ឋបាលជលផល លោក ចេង ចាន់ដូណា អភិបាលរងស្រុកកំពង់លែង បានចុះបង្ក្រាបបទល្មើសនេសាទ នៅចំណុច ក្រោមទំនប់ស្រុក ក្នុងភូមិសាស្ត្រ ឃុំស្វាយរំពារ និងនៅចំណុចបាយឆៅ ក្នុងភូមិសាស្ត្រ ឃុំសំរោងសែន ដោយប្រើប្រាស់មធ្យោបាយ បាឡាស្មាច់ ចំនួន ០៨គ្រឿង ។
ជាលទ្ធផលបានធ្វើការរុះរើរបាំងសាច់អ៊ួនក្រឡាញឹកបានចំនួន២៨ កន្លែង ប្រវែង ១៤០០ ម៉ែត្រ, លបលូ ៥៦ លូ, បង្គោល ៨០០ ដើម, ប្រលេងកូនត្រីចម្រុះ ៤០គីឡូក្រាម សម្ភារនិងវត្ថុតាងត្រូវបានយកទៅរក្សាទុកនៅខណ្ឌរដ្ឋបាលជលផលស្រុកកំពង់លែង ។
ករណីបង្ក្រាប បទល្មើសនេសាទនៅក្នុងរដូវហាមឃាត់ ត្រីពងកូននេះ គេមើលឃើញថា បានធ្វើឡើងជាប្រចាំ តែមិនបានឃាត់ខ្លួន ជនសង្ស័យណានោះឡើយ គ្រាដែលសមត្ថកិច្ចទៅដល់ ជនល្មើសគេចខ្លួនបាត់មុនទៅហើយ ៕
