រាជធានីភ្នំពេញ ៖ តារាចម្រៀងដ៏មានប្រជាប្រិយលោក ខេម ដែលបច្ចុប្បន្នកំពុងច្រៀងនៅផលិតកម្ម Galaxy Navatra ត្រូវបានផលិតកម្មទីក្រុងភាពយន្ន (Town Production) កោះហៅចូលខ្លួនដោះស្រាយ និងបកស្រាយរឿងកិច្ចសន្យាជាមួយផលិតកម្ម ក្រោយកំពុងនៅជាប់កិច្ចសន្យានៅឡើយតែច្រៀងនៅផលិតកម្មផ្សេង ។ នេះបើយោងតាមប្រភពពីសេចក្តីជូនដំណឹងផ្លូវការរបស់ផលិតកម្មទីក្រុងភាពយន្ត (ថោន) ដែលធ្វើនៅថ្ងៃទី២៤ ខែសីហា ឆ្នាំ២០២០ នេះ ។
តាមប្រភពសេចក្តីជូនដំណឹងរបស់ផលិតកម្មថោនបានឱ្យដឹងថា តារាចម្រៀងលោក ខេម ដែលមានឈ្មោះ ប៉ុន សុណារិន ជាតារាចម្រៀងប្រចាំផលិតកម្មទីក្រុងភាពយន្ត (ថោន) អញ្ជើញទៅកាន់ផលិតកម្មដែលមានទីស្នាក់ការកណ្តាលដីឡូតិ៍លេខ៣៥ ផ្លូវ១៧១១ សង្កាត់គីឡូម៉ែត្រលេខ៦ ខណ្ឌឬស្សីកែវ រាជធានីភ្នំពេញ ដើម្បីដោះស្រាយ និងបកស្រាយរឿងកិច្ចសន្យាជាមួយផលិតកម្មដោយកំពុងនៅជាប់កិច្ចសន្យានៅឡើយតែច្រៀងនៅផលិតកម្មផ្សេង ។
តាមសេចក្តីជូនដំណឹងខាងលើបានឱ្យដឹងទៀតថា កិច្ចសន្យាការងាររវាងផលិតកម្មទីក្រុងភាពយន្ត (ថោន) ជាមួយលោក ប៉ុន សុណារិន ហៅ ខេម នឹងចប់នៅចុងខែធ្នូ ឆ្នាំ២០២០ ។ ដូច្នេះផលិតកម្មតម្រូវឱ្យលោក ខេម ចូលខ្លួនដោះស្រាយជាមួយផលិតកម្មនៅថ្ងៃទី២៥ ខែសីហា ឆ្នាំ២០២០ វេលាម៉ោង១៥៖០០នាទីជាកំហិត ៕
ដោយ ៖ សំណាង