រាជធានីភ្នំពេញ ៖ នៅព្រឹកថ្ងៃទី២៤ សីហានេះ លោកស្រី បុប្ផា ផានី អនុប្រធានមន្ទីរសាធារណៈការ និងដឹកជញ្ជូនរាជធានីភ្នំពេញ សហការជាមួយអាជ្ញាធរមូលដ្ឋាន និងសមត្ថកិច្ចពាក់ព័ន្ធ ចុះបិទអាជីវកម្មយានដ្ឋានកែច្នៃ និងជួសជុលរថយន្ដខុសច្បាប់ ជាង៤០ទីតាំង ក្នុងចំណោមប្រមាណ១១០ទីតាំង ក្នុងខណ្ឌសែនសុខ ។
លោកស្រី បុប្ផា ផានី បានឲ្យដឹងថា មន្ត្រីជំនាញ រកឃើញយានដ្ឋានជួសជុលរថយន្ដខុសច្បាប់ខាងលើ គឺធ្វើឡើងតាមអនុសាស ន៍របស់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងការណែនាំរបស់ លោក ឃួង ស្រេង អភិបាលរាជធានីភ្នំពេញ ត្រូវចុះពិនិត្យភាពស្របច្បាប់ និងបិទចោលនូវយានដ្ឋានទាំងឡាយណា ដែលគ្មានច្បាប់អនុញ្ញាត ។
លោកស្រី បុប្ផា ផានី បានបញ្ជាក់ទៀតថា មន្ទីរសាធារណៈការ និងដឹកជញ្ជូនរាជធានីភ្នំពេញ បានធ្វើការចុះបិទអាជីវកម្មទីតាំងយានដ្ឋានកែច្នៃ ដែលនៅសេសសល់ មិនទាន់មានច្បាប់អនុញ្ញាតឲ្យអស់ទាំងស្រុង ។ បច្ចុប្បន្ន យានដ្ឋានជួសជុលរថយន្តក្នុងរាជធានីភ្នំពេញ សរុបមានចំនួន៩៧១ទីតាំង ក្នុងនោះគ្មានច្បាប់អនុញ្ញាត ចំនួន៣៩០ទីតាំង ដែលមន្ទីរជំនាញ នឹងសហការជាមួយសមត្ថកិច្ចពាក់ព័ន្ធ ចុះបិទអាជីវកម្មជាបន្ដបន្ទាប់ទៀត ។
គួររម្លឹកថា កាលពីពេលកន្លងទៅ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានគណៈកម្មាធិការជាតិ សុវត្ថិភាពចរាចរណ៍ផ្លូវគោក បានបញ្ជាឲ្យក្រសួងពាក់ព័ន្ធ ត្រូវធ្វើការរួមគ្នាដើម្បីពិនិត្យ និងចាត់វិធានការចំពោះយានដ្ឋានកែច្នៃរថយន្ដដែលគ្មានច្បាប់អនុញ្ញាត ព្រោះការដំណើរការឲ្យគ្មានច្បាប់ ហើយកែច្នៃមិនត្រឹមត្រូវបានលក្ខណៈបច្ចេកទេស ក៏ជាដើមចមដែលនាំឲ្យមានគ្រោះថ្នាក់ចរាចរណ៍ផងដែរ ៕