ខេត្តមណ្ឌលគិរី ៖ សមត្ថកិច្ចចម្រុះចុះបង្ក្រាបទីតាំងខារ៉ាអូខេ កាឡាក់ស៊ីធូ ស្ថិតនៅភូមិអូរអាម ឃុំស្រែខ្ទុម ស្រុកកែវសីមា ខេត្តមណ្ឌលគិរី កាលពីវេលាម៉ោង១០យប់ថ្ងៃទី១២ ខែសីហា ឆ្នាំ២០២០ ។
ក្នុងការចុះបង្ក្រាបទីតាំងខារ៉ាអូខេខាងលើ ត្រូវបានធ្វើឡើង ដែលដឹកដោយលោកស្រីឧត្តមសេនីយ៍ត្រី ហួន គឹមហេង ស្នងការរង ទទួលផែនប្រឆាំងការជួញដូរមនុស្ស និងការពារអនីតិជន និងកម្លាំងអធិការនគរបាល ស្រុកកកែវសីមា ។
សមត្ថកិច្ច បានដកហូតសម្ភារមួយចំនួន រួមមាន ទី១-ថាច់ចុចបទចំរៀងចំនួន ០៣គ្រឿង ទី២-ម៉ៃក្រូហ្វូនចំនួន ០៤គ្រឿង ទី៣-ក្បាលអ៊ីហ្វិច ចំនួន ០៣គ្រឿង និងទី៤-អំភ្លីចំនួន ០៣គ្រឿង។ សម្ភារទាំងនេះ សមត្ថកិច្ចជំនាញបានយកមករក្សាទុកនៅការិល័យប្រឆាំងការជួញដូរមនុស្ស និងការពារអនីតិជន នៃស្នងការរដ្ឋាននគរបាលខេត្ត ។
លោកស្រីឧត្តមសេនីយ៍ត្រី ហួន គឹមហេង បានបញ្ជាក់ថា កម្លាំងការិយាល័យប្រឆាំងការជួញដូរមនុស្ស និងការពារអនីតិជន និងកម្លាំងអធិការរដ្ឋាននគរបាល ស្រុកកែវសីមា បានលបឆ្មក់ចូលបង្ក្រាបជាក់ស្តែង ឃើញមាននារីបម្រើសេវា ខារ៉ាអូខេនៅយីហោ កាឡាក់ស៊ីធូ មានចំនួន៨នាក់ និងមានអនីតិជន អាយុក្រោម ១៨ឆ្នាំម្នាក់ និងរឹបអូសបានសម្ភារ ដែលបម្រើឱ្យសេវាខារ៉ាអូខេមួយចំនួន ។
លោកស្រីឧត្ដមសេនីយ៍ត្រី ស្នងកររង បានឱ្យដឹងបន្ថែមថា ស្របពេលដែលជំងឺកូវីដ១៩ មិនទាន់ស្ងប់ស្ងាត់ ក្នុងប្រទេសកម្ពុជា គ្រប់សេវាកម្មខារ៉ាអូខេ ខ្លិបកម្សាន្ត ដែលមានប្រមូលផ្តុំមនុស្សច្រើនទាំងអស់ នៅក្នុងខេត្តមណ្ឌលគិរី ត្រូវផ្អាកសកម្មភាព ដើម្បីអនុវត្តន៍ទៅតាមសារាចរណែនាំរបស់រាជរដ្ឋាភិបាល និងសេចក្តីជូនដំណឹងរបស់ក្រសួងសុខាភិបាល ក្នុងការទប់ស្កាត់ការរីករាលដាល ជំងឺកូវីដ១៩ ក្នុងនោះដែរ មន្ទីរទេសចរណ៍ បានសហការជាមួយអាជ្ញាធរមូលដ្ឋានស្រុក ចុះបិទបម្រាម មិនអនុញ្ញាតឲ្យមានសេវាប្រមូលផ្ដុំឡើយ ៕