រាជធានីភ្នំពេញ ៖ យោងតាមប្រភពពីគេហទំព័រហ្វេសប៊ុកផេកផ្លូវការរបស់លោកឧកញ៉ា ឌួង ឆាយ កាលពីវេលាម៉ោង០៦និង៤៣នាទីយប់ ថ្ងៃទី០៧ ខែសីហា ឆ្នាំ២០២០ ដែលបានបង្ហោះរូបភាពក្មេងស្រី សុជាតា ដែលរងគ្រោះដោយសារការឆូតមុខ និងដងខ្លួន ដោយលោកឧកញ៉ា និងភរិយា ព្រមទាំងកូនបាននាំក្មេងស្រីរូបនេះដើម្បីជាការលំហែអារម្មណ៍ចៀសវាងមានការធុញថប់ និងប៉ះពាល់សតិអារម្មណ៍របស់ក្មេង ។
តាមប្រភពលោកឧកញ៉ា ឌួង ឆាយ បានបង្ហោះរូប និងសំណេរថា ៖«ថ្ងៃនេះឆ្លៀតពេលពីការងារបានទិញតុក្កតា និងជូនថវិកាបន្តិចបន្តួចអោយក្មួយ សុជាតា និងសួរសុខទុក្ខអំពីស្ថានភាពជំងឺមុខរបួសរបស់ក្មួយ និងញាំតែទឹកដោះគោគុជអោយក្មួយស្រីបានចេញពីផ្ទះខ្លះដើម្បីអោយក្មួយមានភាពរឹងមាំ និងក្លាហានហ៊ានចេញមកក្រៅផ្ទះជួបគេឯង ពីព្រោះខ្ញុំបារម្ភអំពីសុខភាពផ្លូវចិត្ត និងសតិអារម្មណ៍របស់ក្មួយស្រី។ ពូមីងគ្មានអ្វីក្រៅពីអាណិត និងលើកទឹកចិត្តបួងសួងបន់ស្រន់អោយក្មួយស្រីបានជាសះស្បើយដូចដើម » ។
គួររម្លឹកផងដែរថា លោកឧកញ៉ា ឌួង ឆាយ និង ភរិយា ក៏ធ្លាប់បានចុះទៅសួរសុខទុក្ខដោយផ្ទាល់ជាមួយនឹងគ្រួសារក្មេងស្រីរងគ្រោះ និងបានសន្យាថា ជួយក្មួយស្រី សុជាតា ដោយនាំទៅព្យាបាលមុខនៅប្រទេសថៃ ឬកូរ៉េ ឲ្យបានជាសះស្បើយនៅពេលដែលស្ថានភាពជំងឺកូវីដ-១៩ បានធូរស្រាល ៕