រាជធានីភ្នំពេញ ៖ យោងតាមផេកអគ្គស្នងការដ្ឋាននគរបាលជាតិបានឲ្យដឹងថា នៅវេលាម៉ោង ២និង៤០នាទីទៀបភ្លឺ ថ្ងៃទី០៨ ខែសីហា ឆ្នាំ២០២០ មានអគ្គីភ័យមួយកន្លែងកើតឡើងនៅស្ថិតនៅ រោងចក្រ GCS ផ្លូវបេងតុងទួលពង្រ ក្រុមទី៣ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
តាមរបាយការណ៍បានឲ្យដឹងថា មា្ចស់ទីតាំងឈ្មោះ យឹម រ៉ាដា ជនជាតិខែ្មរ ភេទប្រុស អាយុ៤៩ឆ្នាំ ជានាយកក្រុមហ៊ុន , មានសំណង់ ថ្មប្រក់សង្ក័សី បានបណ្តាលឲ្យខូចខាតសម្ភារ ៖ ឆេះឃ្លាំងសាងសង់ពីបេតុងប្រក់ស័ង្កសី ទំហំ៣២ម៉ែត្រគុណនឹង៧០ម៉ែត្រ អស់ចំនួន០១ឃ្លាំង, ឆេះរថយន្តដឹកទំនិញចំណុះ ៣.៥ តោនចំនួន០១គ្រឿង, រថយន្តដឹកទំនិញចំណុះ ១.៥ តោនចំនួន០១គ្រឿង, ឆេះម៉ូតូកង់បីដឹកទំនិញចំនួន០២គ្រឿង, ឆេះម៉ូតូចំនួន០៤គ្រឿង, ឆេះគ្រឿងបរិក្ខារអគ្គិសនី ម្នាងសិលា ដែកគ្រោងជញ្ជាំង ពិដាន សរុបជាទឹកប្រាក់អស់ប្រហែលចំនួន ១,២ លានដុល្លារអាមេរិក តែមិនបណ្តាលឲ្យមានមនុស្សរងរបួសឬស្លាប់ទេ ។ ចំពោះមូលហេតុគឺបណ្តាលមកពីឆ្លងចរន្តអគ្គិសនី ។
តាមរបាយការណ៍បានឲ្យដឹងទៀតថា ក្នុងការឆាបឆេះនេះមានរថយន្តការិយាល័យអគ្គិភ័យចំនួន២០គ្រឿង ប្រើប្រាស់ទឹកអស់ចំនួន ១៤០ឡាន ។ ក្នុងនោះរថយន្តក្រសួងមហាផៃ្ទ ចំនួន០៣គ្រឿង ប្រើប្រាស់ទឹកអស់ចំនួន០៩ឡាន, រថយន្តអង្គភាពង៧០ ចំនួន០៥គ្រឿង ប្រើប្រាស់ទឹកអស់ចំនួន១០ឡាន, រថយន្តអាវុធហត្ថចំនួន០៣គ្រឿង ប្រើប្រាស់ទឹកអស់ចំនួន២១ឡាន, រថយន្តទីក្រុងកោះពេជ្រ ចំនួន០២គ្រឿងប្រើប្រាស់ទឹកអស់ចំនួន០៦ឡាន, រថយន្តស្រាបៀរកម្ពុជាចំនួន០១គ្រឿង ប្រើប្រាសើទឹកអស់ចំនួន០៥ឡាន ។ ករណីខាងលើនេះសមត្ថកិច្ចបានពន្លត់រលត់ជាស្ថាពរនៅវេលាម៉ោង១០និង០០នាទីព្រឹក ៕
