ហាណូយ ៖ លោកនាយករដ្ឋមន្ត្រីវៀតណាម Nguyen Xuan Phuc បាននិយាយកាលពីថ្ងៃសុក្រ ទី៧ សីហានេះថា ហានិភ័យ នៃការឆ្លងរាលដាលកូវីដ-១៩ នៅក្នុងប្រទេស គឺនៅតែ“ខ្ពស់”នៅឡើយ បន្ទាប់ពីការផ្ទុះរលកថ្មី នៃការចម្លងក្នុងសហគមន៍នៅកណ្តាលក្រុងដាណាងកាលពីថ្ងៃទី ២៥ ខែកក្កដា ។
យោងតាមសេចក្តីថ្លែងការណ៍របស់លោកនាយករដ្ឋមន្ត្រី Nguyen Xuan Phuc បានអោយដឹងថា “ហានិភ័យនៃការឆ្លងសហគមន៍គឺខ្ពស់ខ្លាំងណាស់ ដែលទាមទារឱ្យមានការប្តេជ្ញាចិត្ត សាមគ្គីភាព និងការទទួលខុសត្រូវបន្ថែមទៀត ទាំងអស់គ្នា ដើម្បីចាត់វិធានការខ្លាំងក្លា និងរឹងមាំជាងនេះ ក្នុងរយៈពេល២សប្តាហ៍ខាងមុខនេះ” ។
ប្រទេសវៀតណាម បានរាយការណ៍ពីការឆ្លងថ្មីចំនួន ៣៧ករណីបន្ថែមទៀត នៅពីថ្ងៃសុក្រ នាំឲ្យចំនួនអ្នកឆ្លងវីរុសសរុបនៅក្នុងប្រទេសកើនដល់ ៧៨៤នាក់ហើយ និងមានអ្នកស្លាប់ចំនួន ១០នាក់ ។
អាជ្ញាធរដាណាងបានបញ្ជាក់ថា មានជាង ២០០ករណី ចាប់តាំងពីវីរុសលេចឡើងនៅទីនោះ តែស្ថានភាពនៅដាណាងពេលនេះ កំពុងស្ថិតក្រោមការគ្រប់គ្រងទាំងស្រុង ។ ការផ្ទុះឡើងនៃជំងឺនេះ ទំនងជានឹងឈានដល់កម្រិតកំពូលក្នុងរយៈពេល ១០ថ្ងៃខាងមុខទៀត ។ ពហុកីឡដ្ឋានកីឡាមួយ ត្រូវបានប្តូរទៅជាមន្ទីរពេទ្យបណ្តោះអាសន្ន ដែលមានគ្រែ ១,០០០ ត្រៀមប្រើប្រាស់ ប្រសិនបើមន្ទីរពេទ្យរដ្ឋ គ្របដណ្ដប់ពេញទៅដោយអ្នកជំងឺកូវីដ-១៩ ដែលនេះវាអាចនឹងកើតមាន ។
នាយករដ្ឋមន្ត្រីវៀតណាម បាននិយាយថា ការធ្វើតេស្តលឿន និងត្រឹមត្រូវ គឺជាគន្លឹះសំខាន់ក្នុងការទប់ស្កាត់ការរីករាលដាលនេះ ខណៈដែលអាជ្ញាធរក្រុងហាណូយ បានចាប់ផ្តើមធ្វើតេស្តឡើងវិញ នូវមនុស្សរាប់ពាន់នាក់ ដែលបានវិលត្រឡប់មកពីក្រុងដាណាងវិញ ៕
