ចាប់ជនឆបោកទឹកប្រាក់ជាង១០ម៉ឺនដុល្លារ រឿងលក់វត្ថុស័ក្តិសិទ្ធិគោបា
រាជធានីភ្នំពេញ ៖ កម្លាំងនាយកដ្ឋាននគរបាលព្រហ្មទណ្ឌ ដឹកនាំដោយលោកវរសេនីយ៍ឯក ខេង ម៉េងឈាង នាយការិយាល័យព្រមហ្មទណ្ឌកំរិតស្រាល សហការជាមួយកម្លាំងស្នងការដ្ឋាននគរបាលខេត្តកំពង់ស្ពឺ កាលពីថ្ងៃទី០១ ខែសីហា ឆ្នាំ២០២០ បង្ក្រាបជាក់ស្តែងករណីឆបោក (លក់វត្ថុស័ក្តិសិទ្ធិគោបា) ត្រង់ចំណុចភូមិត្រពាំងជ្រៃ ឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ បានឃាត់ខ្លួនជនសង្ស័យ០១នាក់ ឈ្មោះ រិន សុភ័ក្ត្រ ហៅ រិន សារ៉េត (រ៉ា) ពាក់ព័ន្ធករណី ឆបោក ( លក់វត្ថុស័ក្តិសិទ្ធិ គោបា ) ដើម្បីយកមកសាកសួរ នៅការិយាល័យជំនាញ ។
តាមចម្លើយរបស់ឈ្មោះ រិន រិន សុភ័ក្ត្រ ហៅ រិន សារ៉េត បានសារភាពថា ខ្លួនពិតជាបានធ្វើសកម្មភាពឆបោកយកប្រាក់ពីជនរងគ្រោះ ភេទប្រុស អាយុ៦២ឆ្នាំ ជនជាតិខ្មែរ ចំនួន ១០០,០០០$ (ដប់ម៉ឺនដុល្លារអាមេរិក) ប្រាកដមែន ។
បច្ចុប្បន្ន ជនជងស្ស័យខាងលើ ការិយាល័យជំនាញ បានសាកសួរ និងកសាងសំណុំរឿង ទៅអយ្យការអមសាលាដំបូង រាជធានីភ្នំពេញ ចាត់ការតាមនីតិវិធី ។
គួររម្លឹកដែលថា កាលពីថ្ងៃទី២១ ខែឧសភា ឆ្នាំ២០២០ លោក វរសេនីយ៍ឯក ព្រំ សារឿន នាយការិយាល័យអនុវត្តដីកា បានធ្វើការឃាត់ខ្លួន ឈ្មោះ សៀវ សុខនឿន ភេទប្រុស អាយុ៤១ឆ្នាំ តាមបណ្តឹងរបស់ជនរងគ្រោះ ចំនួន០៥នាក់ ក្នុងករណី ឆបោកប្រាក់ចំនួន ១៥៩,៥០០$ (ដប់ប្រាំម៉ឺនប្រាំបួនពាន់ ប្រាំរយដុល្លារអាមេរិក) (ឆបោកលក់សំរិទ្ធិគោបា) ក្លែងបន្លំ ។
ក្រោយពីធ្វើការសាកសួរ ឈ្មោះ ស៊ីវ សុខនឿន បានសារភាពថា ខ្លួនរួមជាមួយបក្ខពួកឈ្មោះ រិន សុភ័ក្ត្រ ហៅ រិន សារ៉េត ពិតជាបានប្រព្រឹត្តករណី ឆបោកប្រាក់ ពីជនរងគ្រោះ ទាំង០៥នាក់ ខាងលើប្រាកដមែន ។ ក្រោយពីការសួរនាំ ឈ្មោះ ស៊ីវ សុខនឿន រួចនាយកដ្ឋាននគរបាលព្រហ្មទណ្ឌ បានបញ្ជូនជនសង្ស័យឈ្មោះ ស៊ីវ សុខនឿន ទៅអយ្យការ អមសាលាដំបូងរាជធានីភ្នំពេញបន្ទាប់មកនៅថ្ងៃទី២៤ ខែឧសភា ឆ្នាំ២០២០ លោក ឡុង វណ្ណា ចៅក្រមស៊ើបសួរ នៃសាលាដំបូងរាជធានីភ្នំពេញ បានចេញដីកាបង្គាប់ឲ្យឃុំខ្លួន ឈ្មោះ ស៊ីវ ស៊ីនឿន នៅពន្ធនាគារមណ្ឌលអប់រំកែប្រែទី១ (ម១) ។
លុះដល់ថ្ងៃទី០២ ខែសីហា ឆ្នាំ២០២០ នាយកដ្ឋាននគរបាលព្រហ្មទណ្ឌ បានទទួលដីកាចាត់ឲ្យស៊ើបសួរជំនួស លេខ ៤៤១ ព្រទ ចុះថ្ងៃទី០២ ខែកក្កដា ឆ្នាំ២០២០ របស់លោក ស៊ លីនណា ចៅក្រមស៊ើបសួរ នៃសាលាដំបូងរាជធានីភ្នំពេញ ឲ្យរកសាវតាជាតិ របស់ឈ្មោះ រិន សារ៉េត ហៅ រិន សុភ័ក្ត្រ ភេទប្រុស អាយុ៤១ឆ្នាំ ជនជាតិខ្មែរ ៕