រាជធានីភ្នំពេញ ៖ កាលពីថ្ងៃទី៥ ខែសីហា សមត្ថកិច្ចចម្រុះចុះទៅផ្អាកដំណើការផលិតរបស់សិប្បកម្មផលិតប្រហិតមួយកន្លែងយីហោ លីហួង ស្ថិតនៅភូមិព្រៃព្រីងខាងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ និងតម្រូវឱ្យម្ចាស់ទីតាំងចូលខ្លួនទៅបំភ្លឺ ។
ការចុះផ្អាកសិប្បកម្មខាងលើនេះ គឺបន្ទាប់ពីមន្ត្រីជំនាញ រកឃើញថា ការផលិតគ្មានអនាម័យ និងគ្មានច្បាប់អនុញ្ញាតត្រឹមត្រូវ ចេញពីក្រសួងពាណិជ្ជកម្ម ដែលអាចបង្កផលប៉ះពាល់ដល់សុខភាពអ្នកបរិភោគ ។ ម្ចាស់ទីតាំងសិប្បកម្មនេះឈ្មោះ ព្រៃ សុភ័ក្ត្រ ភេទប្រុស អាយុ៣៧ឆ្នាំ មិនត្រូវបានសមត្ថកិច្ចឃាត់ខ្លួននោះទេ ។
សមត្ថកិច្ច បានប្រាប់សារព័ត៌មានក្នុងស្រុកឱ្យដឹងថា សិប្បកម្មផលិតប្រហិតមួយនេះ ត្រូវបានពិនិត្យឃើញថា ពុំមានលិខិតអនុញ្ញាតពីក្រសួងពាណិជ្ជកម្មឡើយ ហើយបានលើកស្លាកយីហោខុសពីលិខិតបញ្ជាក់ ជាពិសេសទៀតនោះ គឺសង្វាក់ផលិតកម្មអត់មានអនាម័យ រីឯវិញ្ញាបនបត្របញ្ជាក់គុណភាពហួសសុពលភាព។ មិនតែប៉ុណ្ណោះចំពោះ ផលិតផលប្រហិតដែលកំពុងផលិតនោះ គឺមានការខុសពីផលិតផលដែលបានស្នើសុំចុះបញ្ជីផលិតផល (ចបផ) ហើយផលិតផលសរុបចំនួន៨ប្រភេទ ពុំបានបិទ (ច.ប.ផ) លើសំបកវិចខ្ចប់ឡើយ ។
ក្រោយពីការពិនិត្យរួច កម្លាំងសម្រេចបិទផ្អាកដំណើរការផលិតជាបណ្ដោះអាសន្ន និងតម្រូវឲ្យម្ចាស់ទីតាំងចូលខ្លួនទៅបំភ្លឺមុខសមត្ថកិច្ចប្រយុទ្ធប្រឆាំងផលិតផលក្លែងក្លាយ (គ.ប.ផ.ក) ហើយកម្លាំងដកហូតយកសំណាកផ្សេងៗ ទៅដើម្បីធ្វើការពិនិត្យ និងពិសោធន៍នៅការិយាល័យ (គបផក)៕