យោងតាមកាសែត Mid Day ដែលមានមូលដ្ឋាននៅទីក្រុងបុមបៃបានឲ្យដឹងថា តារាសម្តែងដ៏ល្បីប្រចាំប្រទេសឥណ្ឌាលោក Sameer Sharma ត្រូវបានគេប្រទះឃើញស្លាប់នៅក្នុងផ្ទះរបស់ខ្លួនដែលស្ថិតនៅជាយភាគខាងលិចក្រុងម៉ាឡាដដោយសង្ស័យលោកសម្លាប់ខ្លួន ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយនៅរសៀលថ្ងៃទី០៦ ខែសីហា ឆ្នាំ២០២០ នេះ ។
តាមប្រភពសារព័ត៌មាន Mid Day បានដកស្រង់សំដីប៉ូលិសបានឲ្យដឹងថា តារាសម្តែងឥណ្ឌាលោក Sameer Sharma បានធ្វើអត្តឃាតនៅឯគេហដ្ឋានរបស់គាត់ក្នុងក្រុងម៉ាឡាដ នៅទីក្រុង Mumbai ប្រទេសឥណ្ឌា ។ សពរបស់តារាសម្តែង អាយុ៤៤ឆ្នាំរូបនេះត្រូវបានអ្នកយាមម្នាក់ប្រទះឃើញចង.កសម្លាប់ខ្លួនពីពិដានផ្ទះបាយក្នុងផ្ទះល្វែងរបស់គាត់ ។ ប៉ូលិសនិយាយថា Sharma បានស្លាប់យ៉ាងហោចណាស់ពីរថ្ងៃហើយដោយមិនបានទុកដានសម្គាល់អ្វីនោះទេ ។
តាមប្រភពអធិការជាន់ខ្ពស់លោក George Fernandez បាននិយាយថា ៖«ករណីនៃការស្លាប់របស់ជនរងគ្រោះត្រូវបានសមត្ថកិច្ចធ្វើកំណត់ហេតុ ហើយសពត្រូវបានបញ្ជូនទៅធ្វើកោសល្យវិច័យ» ។
អ្នកនិយមលេងអ៊ីនធើណេត និងអ្នកគាំទ្រតារាប្រុសរូបនេះមានការភ្ញាក់ផ្អើលជាខ្លាំងក្រោយពីទទួលដំណឹងថា លោក Sameer Sharma ត្រូវបានគេប្រទះឃើញចង.កសម្លាប់ខ្លួនដូចតារាភាពយន្តបូលីវូដ Sushant Singh Rajput ៕
ប្រភព ៖ Sputnik , ដោយ ៖ សំណាង
