ទីក្រុងបេរូត ៖ ការផ្ទុះដ៏ខ្លាំងក្លាមួយរញ្ជួយកម្ទេចតំបន់កំពង់ផែនៃរដ្ឋធានីបេរូត កាលពីល្ងាចថ្ងៃទី៤ ខែសីហា ឆ្នាំ២០២០ ។ នាយករដ្ឋមន្ត្រីលីបង់ បានប្រកាសដាក់ប្រទេសក្នុងគ្រាអាសន្ន រយៈពេល០២សប្ដាហ៍ ជាមួយគ្នានោះដែរប្រធានាធិបតីលីបង់ បានបញ្ចេញកញ្ចប់ថវិកាសង្គ្រោះបន្ទាន់ចំនួន ៦៦លានដុល្លារ ។
គិតត្រឹមព្រឹកថ្ងៃទី៦ សីហានេះ ចំនួនអ្នកស្លាប់បានកើនឡើងដល់ ១៣៥នាក់ ដោយមានមនុស្សប្រមាណ ៥.០០០នាក់ទៀត បានរងរបួស និងរាប់សិបនាក់ទៀតកំពុងបាត់ខ្លួន ។
ជាតិអាម៉ូញ៉ូមនីត្រាត ចំនួន ២.៧៥០ តោន ដែលជាសារធាតុគីមី បានស្តុកក្នុងកំពង់ផែ ក្នុងរដ្ឋធានីបូរុត រយៈពេល៦ឆ្នាំមកហើយ ។
អភិបាលក្រុងបេរូត លោក Marwan Abboud បានឱ្យដឹងថា ប្រជាជនលីបង់ រហូតដល់ទៅ ៣០០,០០០នាក់ បានបាត់បង់ផ្ទះសម្បែងរបស់ពួកគេ ។
ប្រទេសលីបង់ ដែលមានប្រជាជនសរុបជាង ៦.៨លាននាក់ ពេលនេះកំពុងស្ថិតនៅក្នុងការកាន់ទុក្ខ រយៈពេល០៣ថ្ងៃ គិតចាប់តាំងពីថ្ងៃពុធម្សិលមិញ ខណៈរដ្ឋាភិបាលប្រទេសនេះ ក៏បានប្រកាសរកជំនួយពីបណ្តាប្រទេសសម្ព័ន្ធមិត្ត ដូចជា បារាំង រុស្ស៊ី និងសហរដ្ឋអាមេរិក ជាដើម ៕