រាជធានីភ្នំពេញ ៖ ជាការធ្វេសប្រហែសមួយទើបធ្វើឲ្យឪពុកម្តាយមានការស្រណោះសោកស្តាយកូនជាទីស្រឡាញ់ពន់ពេកក្រោយពីកូនប្រុសកំសត់ម្នាក់របស់ខ្លួនដែលមានអាយុទើបតែ៥ឆ្នាំបានចុះទៅលេងទឹកស្រះមួយកន្លែងតែអកុសលបានរអិលជើងធ្លាក់ចូលទឹកជ្រៅបណ្តាលឲ្យលង់ស្លាប់ ។ ហេតុការណ៍នេះបង្កឲ្យមានការភ្ញាក់ផ្អើលកាលពីព្រឹក ថ្ងៃទី០៥ ខែសីហា ឆ្នាំ២០២០ នៅស្រះទឹកមួយកន្លែង ក្នុងភូមិស្ងួនពេជ្រ សង្កាត់កន្ទោក ខណ្ឌកំបូល ។
ក្មេងរងគ្រោះមានឈ្មោះ វុទ្ធី បាន ភេទប្រុស អាយុ៥ឆ្នាំ រស់នៅក្នុងបន្ទុកគ្រួសារ មានឪពុកឈ្មោះ ឃី វុទ្ធី អាយុ៤០ឆ្នាំ មុខរបរអ្នកនិពន្ធ ម្តាយឈ្មោះ អ៊ុង ឧត្តម អាយុ៣៦ឆ្នាំ មុខរបរលក់ដូរ មានស្រុកកំណើតភូមិ៦ ឃុំស្វាយភ្លាំង ស្រុកក្រូចឆ្មា ខេត្តត្បូងឃ្មុំ ។ បច្ចុប្បន្នស្នាក់នៅផ្ទះជួលក្នុងភូមិស្ងួនពេជ្រ សង្កាត់កន្ទោក ខណ្ឌកំបូល រាជធានីភ្នំពេញ ។ គ្រួសារខាងលើមានកូនប្រុស-ស្រីចំនួន២នាក់ រស់នៅក្នុងបន្ទុកគ្រួសារក្មេងរងគ្រោះជាកូនច្បង ។
តាមប្រជាពលរដ្ឋក្នុងភូមិបានឲ្យដឹងថា នៅមុនពេលកើតហេតុវេលាម៉ោងប្រមាណ៩-១០ព្រឹក ថ្ងៃទី០៥ ខែសីហា ឆ្នាំ២០២០នេះ មានក្មេងប្រុសតូចៗ២នាក់បានចុះទៅលេងទឹកស្រះខាងលើ ហើយប្រជាពលរដ្ឋបានដេញឲ្យទៅវិញម្តងហើយព្រោះថាទីតាំងចំណុចស្រះទឹកមួយនេះហាក់ដូចជាមានអាថ៌កំបាំងនេះបើតាមជំនឿរបស់អ្នកស្រុកក្នុង១ឆ្នាំដឹងតែមានអ្នកលង់ទឹកទីនេះម្នាក់ ។
ហើយក្មេងប្រុសតូចៗទាំង២នាក់ក្រោយពីដេញឲ្យឡើងវិលត្រឡប់ទៅវិញម្តងហើយ ប្រជាពលរដ្ឋនៅក្បែរនោះក៏មិនចាប់អារម្មណ៍ នឹកគិតថាទៅបាត់ហើយ រហូតដល់ក្មេងៗក្នុងភូមិស្រែកឆោឡោមានក្មេងលង់ទឹកទើបនាំគ្នាផ្អើលចុះស្រង់តែក្មេងប្រុសម្នាក់ស្លាប់បាត់ទៅហើយ រីឯក្មេងម្នាក់ទៀតមិនបានចុះទឹកទើបមិនមានបញ្ហាអ្វី ។
តាមប្រភពម្តាយក្មេងរងគ្រោះបានឲ្យដឹងថា គាត់រវល់តែជាប់លក់ដូរនៅផ្ទះក្បែរនោះដែរមិនបានដឹងថា កូនប្រុសមកចុះទៅលេងទឹកបែបនេះនោះទេ ។ ក្មេងរងគ្រោះក្រោយពីសមត្ថកិច្ចចុះទៅពិនិត្យរួចបានប្រគល់សពកូនប្រុសទៅតម្កល់ទុកនៅវត្តស្ងួនពេជ្រ ដើម្បីរៀបចំធ្វើបុណ្យទៅតាមប្រពៃណី ៕
