ទីក្រុងប៉ីជិង ៖ ប្រទេសចិនបានប្តេជ្ញាកាលពីថ្ងៃអង្គារថា នឹងសងសឹកប្រសិនបើសហរដ្ឋអាមេរិកនៅតែមានសកម្មភាពធ្វើទុក្ខបុកម្នេញអ្នកកាសែតចិនដែលអាចជាការបង្ខំពួកគេឲ្យចាកចេញពីទឹកដីសហរដ្ឋអាមេរិកនៅថ្ងៃខាងមុខដោយមិនបន្តទិដ្ឋាការឲ្យអ្នកកាសែតរបស់ចិន ។ នេះបើយោងតាមប្រភពពីទីភ្នាក់ងារសារព័ត៌មាន Reuters បានចេញផ្សាយកាលពីថ្ងៃទី០៤ ខែកក្កដា ឆ្នាំ២០២០ ។
អ្នកនាំពាក្យក្រសួងការបរទេសចិនលោក វ៉ាង វេនប៊ីន (Wang Wenbin) បានប្រាប់ក្រុមអ្នកយកព័ត៌មាននៅក្នុងសន្និសីទសារព័ត៌មានប្រចាំថ្ងៃមួយថា គ្មានអ្នកកាសែតចិននៅសហរដ្ឋអាមេរិកត្រូវបានផ្តល់ការពន្យារពេលទិដ្ឋាការនៅសហរដ្ឋអាមេរិកចាប់តាំងពីថ្ងៃទី១១ ខែឧសភា ឆ្នាំ២០២០ ដោយបានកំណត់ការស្នាក់នៅរបស់ពួកគេត្រឹម៩០ថ្ងៃដោយគ្មានការបន្តទិដ្ឋាការ ។
លោក វ៉ាង បានប្រាប់អ្នកយកព័ត៌មានថា ៖ «សហរដ្ឋអាមេរិកបាន និងកំពុងបង្កើនសកម្មភាពរបស់ខ្លួនប្រឆាំងនឹងអ្នកកាសែតរបស់ចិន ។ សហរដ្ឋអាមេរិកគួរតែកែតម្រូវកំហុសរបស់ខ្លួនជាបន្ទាន់ និងបញ្ឈប់សកម្មភាពរបស់ខ្លួន»។
អ្នកនាំពាក្យក្រសួងការបរទេសចិនរូបនេះបានមានបន្តថា ៖«ប្រសិនបើសហរដ្ឋអាមេរិកនៅតែបន្ត ប្រទេសចិននឹងទទួលយកនូវការឆ្លើយតបចាំបាច់ និងស្របច្បាប់ដើម្បីការពារសិទ្ធិរបស់ខ្លួន» ។
លោក វ៉ាង វេនប៊ីន មិនបានបញ្ជាក់ទេថា តើអ្នកកាសែតចិនប៉ុន្មាននាក់ដែលត្រូវរងផលប៉ះពាល់ និងការសងសឹករបស់ប្រទេសចិនទៅលើសហរដ្ឋអាមេរិកវិញដោយរបៀបណានោះទេ ប៉ុន្តែនិពន្ធនាយកនៃកាសែត Global Times របស់ចិនបាននិយាយថា អ្នកកាសែតសហរដ្ឋអាមេរិកដែលមានមូលដ្ឋាននៅហុងកុងនឹងស្ថិតក្នុងចំណោមអ្នកដែលត្រូវចិនបង្ខំឲ្យចាកចេញវិញដូចគ្នា ។
សូមបញ្ជាក់ផងដែរថា ទំនាក់ទំនងរវាងអាមេរិក-ចិនកាន់តែយ៉ាប់យ៉ឺនយ៉ាងខ្លាំងឡើងៗនាពេលថ្មីៗនេះដោយសារបញ្ហាផ្សេងៗរួមមានសង្គ្រាមពាណិជ្ជកម្ម និងការផ្ទុះជំងឺរាតត្បាត Covid-19 បានផ្លាស់ប្តូរសកម្មភាពរាប់ពាន់ដែលពាក់ព័ន្ធនឹងអ្នកសារព័ត៌មានមួយចំនួនរវាងប្រទេសទាំងពីរក្នុងប៉ុន្មានខែថ្មីៗនេះ ។
សហរដ្ឋអាមេរិកកាលពីខែមីនា ឆ្នាំ២០២០ កន្លងទៅនេះបានកាត់បន្ថយចំនួនជនជាតិចិនដែលត្រូវបានអនុញ្ញាតឲ្យធ្វើការនៅការិយាល័យរបស់ប្រព័ន្ធផ្សព្វផ្សាយរដ្ឋដែលគ្រប់គ្រងដោយសហរដ្ឋអាមេរិកពី១០០នាក់ទៅ១៦០នាក់ ។ ជាការឆ្លើយតប ប្រទេសចិនក៏បានបណ្តេញអ្នកកាសែតអាមេរិកដែលធ្វើការឲ្យកាសែតអាមេរិកចំនួន៣ក្នុងប្រទេសចិនរួមមានកាសែតញូវយ៉ក ថែមស៍, កាសែត វ៉លស្ទ្រីត និងកាសែត វ៉ាស៊ីនតោនប៉ុស្តិ៍ វិញដូចគ្នា ៕
ប្រភព ៖ Reuters , ដោយ ៖ សំណាង