រាជធានីភ្នំពេញ ៖ បុរសវ័យចំណាស់ម្នាក់ចូលចិត្តផឹកស្រាជាប្រចាំ និងស្រវឹងរាល់ថ្ងៃដោយសារតែខ្លាចប៉ះពាល់សុខភាពប្រពន្ធរបស់គាត់បានហាមគាត់មិនឲ្យផឹកទៀត ស្រាប់តែបុរសរូបនោះសម្រេចចិត្តចង.កបញ្ចប់ជីវិតជាមួយនឹងចង្រឹងបង្អួចបង្កឲ្យមានការភ្ញាក់ផ្អើលអស់ប្រជាពលរដ្ឋ និងសមត្ថកិច្ច ។ ហេតុការណ៍បង្កការភ្ញាក់ផ្អើលនេះបានកើតឡើងកាលពីវេលាម៉ោង០២និង៤០នាទីរសៀល ថ្ងៃទី០៤ ខែសីហា ឆ្នាំ២០២០ នេះស្ថិតនៅផ្ទះរបស់ជនរងគ្រោះ ក្នុងភូមិត្រពាំងអញ្ចាញ៦ សង្កាត់ត្រពាំងក្រសាំង ខណ្ឌពោធិ៍សែនជ័យ ។
ជនរងគ្រោះឈ្មោះ ពៅ សុសល ភេទប្រុស អាយុ៥៤ឆ្នាំ មានប្រពន្ធឈ្មោះ កែ ណារី អាយុ៥២ឆ្នាំ មានកូនចំនួន៧នាក់ ប្រុស៣នាក់ មានទីលំនៅទីតាំងក្នុងភូមិត្រពាំងអញ្ចាញ៦ សង្កាត់ត្រពាំងក្រសាំង ខណ្ឌពោធិ៍សែនជ័យ ។
តាមប្រភពពីប្រពន្ធបានឲ្យដឹងថា កន្លងមកប្តីរបស់គាត់ចូលចិត្តផឹកស្រាជាប្រចាំនិងស្រវឹងរាល់ថ្ងៃដោយសារតែខ្លាចប៉ះពាល់ដល់សុខភាពប្តីទើបហាមមិនឲ្យផឹកទៀត ។ រយៈពេល២ថ្ងៃមុនប្តីរបស់គាត់ក៏លែងផឹកស្រាដែរ លុះមកដល់ថ្ងៃកើតហេតុ ខណៈរូបគាត់បានទៅទិញទឹកសណ្តែកដោយទុកចៅប្រុសម្នាក់នៅជាមួយ ពេលដែលគាត់មកវិញក៏មានការឆោឡោអ្នកជិតខាងមកជួយសង្គ្រោះដែរតែដោយអកុសលប្តីរបស់គាត់បានយកខ្សែអង្រឹងចង.កជាប់ជាមួយដែកចង្រឹងបង្អួចស្លាប់បាត់ទៅហើយ ។
ក្រោយកើតហេតុសមត្ថកិច្ចបានចុះទៅដល់ចំណុចកើតហេតុ និងពិនិត្យជាក់ស្តែងហើយបានបញ្ជាក់ថា ជនរងគ្រោះស្លាប់ ដោយសារចង.កពិតប្រាកដមែន រួចក៏ប្រគល់សពទៅក្រុមគ្រួសារធ្វើបុណ្យតាមប្រពៃណី ៕