រាជធានីភ្នំពេញ ៖ ម្ចាស់តាមរកម៉ូតូ តាមប្រព័ន្ធ GPS ឃើញជនសង្ស័យជិះម្តុំណាហ្គាវើលដ៍ ក៏ប្តឹងសមត្ថកិច្ចឲ្យឃាត់ខ្លួនតែម្តង កាលពីម៉ោង៧និង៣០នាទីយប់ ថ្ងៃទី០១ សីហា ២០២០ នៅចំណុចផ្ទះជួលតាមផ្លូវលេខ៩៥ ផ្ទះលេខ៨៨ ស្ថិតក្នុងភូមិ៣ សង្កាត់បឹងត្របែក ខណ្ឌចំការមន ។
បើតាមនារីរងគ្រោះ បានប្រាប់អោយដឹងថា រូបនាងមានឈ្មោះ លឹម លីយ៉ា អាយុ២៨ឆ្នាំ មុខរបរជានិស្សិត ស្នាក់នៅបន្ទប់ជួល ម៉ូតូម៉ាក ZOOMER-X ពណ៌ស ពាក់ស្លាកលេខ សៀមរាប ១V-៤១៣១ ។
នារីរងគ្រោះខាងលើ បានប្រាប់បន្តថា នៅមុនពេលកើតហេតុ រូបនាងចេញពីសាលារៀនម៉ោង១១ព្រឹក ហើយបានចាក់សោម៉ូតូនៅជាន់ក្រោម រួចក៏ឡើងទៅបន្ទប់ជួលនៅជាន់ទី១ លុះដល់ម៉ោង៤ និង៣០នាទីរសៀល ក៏ចុះមកក្រោម ស្រាប់តែបាត់ម៉ូតូតែម្តង ទើបទូរស័ព្ទប្រាប់បងប្អូនដើម្បីដើររក ។ ដើររកដោយសារម៉ូតូរបស់នាងមានភ្ជាប់ប្រព័ន្ធ GPS ក៏ឆែកមើលតាម ទូរស័ព្ទឃើញម៉ូតូគាត់ជិះវិលពេញក្នុងក្រុងតែម្តង ។ នាងជិះតាមរហូតដល់ម៉ោង៧និង៣០នាទីយប់ ក៏រកឃើញជនសង្ស័យជិះម៉ូតូមកដល់មុខណាហ្គាវើលដ៍ ក្នុងសង្កាត់ទន្លេបាសាក់ ខណ្ឌចំការមន ទើបរូបនាងក៏ប្តឹងនគរបាលឱ្យជួយអន្តរាគមន៍ ឃាត់ជនសង្ស័យ ដើម្បីចាត់ការតាមច្បាប់ ។
នៅចំពោះមុខសមត្ថកិច្ច ជនសង្ស័យមានឈ្មោះឈន ប៊ុនថា ភេទប្រុស អាយុ៣៨ឆ្នាំ មុខរបរបុគ្គលិកក្រុមហ៊ុនឯកជន ស្នាក់នៅបន្ទប់ជួល សង្កាត់បឹងត្របែក ខណ្ឌចំការមន បានប្រាប់ថា មុនកើតហេតុ ខ្លួនបានដើរមកដល់ច្រកឌឿងហែម ក៏ប្រទះឃើញម៉ូតូ ZOOMER-X ដែលចាក់សោទុកចោលយូរហើយ មិនឃើញមានម្ចាស់មកយកសោះ ហើយណាមួយរូបគេ មិនដែលលួចម៉ូតូ និងគ្មានឧបករណ៍សម្រាប់កាច់កម៉ូតូ ក៏បានហៅជាងសោ មកធ្វើកូនសោម៉ូតូ ដោយកុហកជាងថា បាត់សោម៉ូតូ ។ បន្ទាប់ពីធ្វើកូនសោរួចរាល់ ក៏បានជិះចេញពីកន្លែងកើតហេតុ ក្នុងគោលបំណងដើររកកន្លែងបញ្ជាំ តែគ្មានកាតគ្រី ទើបជិះទៅណាហ្គាវើលដ៍ ដើម្បីបញ្ចាំ ប៉ុន្តែចៃដន្យ ម្ចាស់គេតាមមកទាន់ដោយសារម៉ូតូភ្ជាប់ប្រព័ន្ធ GPS ។
ជនសង្ស័យខាងលើ ត្រូវបាននគរបាលកសាងសំណុំរឿងបញ្ជូនទៅអធិការដ្ឋាននគរបាលខណ្ឌ ដើម្បីចាត់ការតាមផ្លូវច្បាប់ ។ ចំណែកម៉ូតូបានប្រគល់ជូនម្ចាស់វិញ ៕
