វៀតណាម ៖ បុរសចំនួន៧នាក់នៅទីក្រុងដាណាងត្រូវបានអាជ្ញាធរផាកពិន័យម្នាក់៧.៥លានដុង (៣២១ដុល្លារ) ក្រោយពីពួកគេជួបជុំគ្នាផឹកស៊ីស្របពេលទីក្រុងដាណាងកំពុងផ្ទុះឡើងវិញខ្លាំងនូវជំងឺ Covid-19 ។ បុរសទាំង៧នាក់នោះត្រូវបានប៉ូលិសប្រទះឃើញនៅម៉ោង១១យប់ថ្ងៃសុក្រសប្តាហ៍មុនក្រោយពីចេញល្បាតបានឃើញពួកគេទាំងនោះកំពុងជួបជុំគ្នាផឹកស្រាបៀរនៅផ្ទះជួលមួយតាមផ្លូវ Ngo Thi Huong ។ នេះបើយោងតាមប្រភពពីទីភ្នាក់ងារសារព័ត៌មានវៀតណាម VN Express ដែលបានចេញផ្សាយនៅថ្ងៃទី០៣ ខែកក្កដា ឆ្នាំ២០២០ នេះ ។
អាជ្ញាធរនៅខណ្ឌ Nai Hien Dong បានណែនាំឲ្យរដ្ឋបាលសង្កាត់ Son Tra ពិន័យពួកគេក្នុងម្នាក់៧.៥លានដុង (៣២១ដុល្លារ)សម្រាប់ការបំពានបំរាមគោចររក្សាគម្លាតដើម្បីបញ្ចៀសការឆ្លងជំងឺ Covid-19 ។ រដ្ឋបាលខណ្ឌ Nai Hien Dong បានផាកពិន័យមនុស្សជាង២០នាក់រួចទៅហើយចំពោះការមិនពាក់ម៉ាស់បន្ទាប់ពីវិធានការគម្លាតសង្គមត្រូវបានអនុវត្ត ។
ទីក្រុង Da Nang ដែលឥឡូវនេះជាចំណុចផ្ទុះជំងឺកូវីដធំជាងគេរបស់ប្រទេសវៀតណាមដោយមាន១២០ករណីគឺបានចាប់ផ្តើមដាក់វិធានការគម្លាតសង្គមរយៈពេល១៥ថ្ងៃកាលពីថ្ងៃទី២៨ ខែកក្កដា ឆ្នាំ២០២០ កន្លងទៅនេះដែលតម្រូវឲ្យប្រជាជនស្នាក់នៅក្នុងផ្ទះ និងរក្សាគម្លាតយ៉ាងតិចពីរម៉ែត្រពីគ្នានៅទីសាធារណៈ ។ ការជួបជុំជាសាធារណៈដែលមានមនុស្សច្រើនជាងពីរនាក់ត្រូវបានហាមឃាត់លើកលែងតែនៅការិយាល័យ សាលារៀន និងមន្ទីរពេទ្យប៉ុណ្ណោះ ។
ទន្ទឹមនឹងនេះដែររដ្ឋាភិបាលបានសារភាពកាលពីថ្ងៃអាទិត្យថា ខ្លួនមិនអាចរកប្រភពដើមនៃការផ្ទុះឡើងក្នុងទីក្រុង Da Nang ឃើញទេ រហូតមកដល់ពេលនេះប្រទេសវៀតណាមមានករណីជំងឺកូវីដ១៩សរុបចំនួន៦២១ករណី និងមនុស្ស៦នាក់បានស្លាប់ដោយសារជំងឺនេះ ៕
ប្រភព ៖ VN Express , ដោយ ៖ សំណាង
