ខេត្តកណ្តាល ៖ បុរសម្នាក់បានអូសខ្សែភ្លើងមកភ្ជាប់ជាមួយម៉ូទ័របូមទឹកដើម្បីបូមទឹកដាក់ពាងដោយដៃម្ខាងកាន់ម៉ូទ័រស្រាប់តែម៉ូទ័រឆ្លងភ្លើងបណ្តាលឲ្យឆក់ដួលទៅនឹងដីភ្លាមៗនោះមានអ្នកជិតខាងឃើញហៅគ្នាជួយតែអកុសលស្លាប់បាត់ទៅហើយ ។ ហេតុការណ៍នេះបានកើតឡើងកាលពីវេលាម៉ោង០៩និង០៥នាទីព្រឹក ថ្ងៃទី០៣ ខែកក្កដា ឆ្នាំ២០២០ នៅចំណុចភូមិឈើទាល ឃុំឈើទាល ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះ ថា ថាច ភេទប្រុស អាយុ៣៣ឆ្នាំ ជនជាតិខ្មែរ មុខរបរកសិករ មានទីលំនៅចំណុចភូមិឈើទាល ឃុំឈើទាល ស្រុកកៀនស្វាយ ខេត្តកណ្តាល មានប្រពន្ធឈ្មោះ ប៉ាង វណ្ណៈ អាយុ២៨ឆ្នាំ ។
តាមការបំភ្លឺពីប្រពន្ធជនរងគ្រោះបានបំភ្លឺប្រាប់សមត្ថកិច្ចថា ជនរងគ្រោះបានទៅបូមទឹកដាក់ពាងហើយម៉ូទ័របូមទឹកមានចម្ងាយពីផ្ទះប្រវែង៣៥ម៉ែត្រដូចសព្វដង ដោយប្រើខ្សែភ្លើងមួយខ្សែអូសមកភ្ជាប់ជាមួយម៉ូទ័របូមទឹកពេលដោតខ្សែភ្លើងចូលម៉ូទ័រដោយដៃឆ្វេងជនរងគ្រោះកាន់ជាប់ម៉ូទ័រ ស្រាប់តែម៉ូទ័រឆ្លងភ្លើងបណ្តាលឲ្យជនរងគ្រោះឆក់ដួលទៅលើដីភ្លាមនោះក៏មានអ្នកជិតខាងឃើញស្រែកហៅគ្នាមកជួយតែជនគ្រោះបានស្លាប់បាត់ហើយ ។
ក្រោយទទួលបានព័ត៌មាននគរបាលប៉ុស្តិ៍ឈើទាលបានចុះដល់កន្លែងកើតហេតុដោយសហការជាមួយកម្លាំងជំនាញកោសល្យវិច័យស្រុកកៀនស្វាយ គ្រូពេទ្យមណ្ឌលសុខភាពឃុំឈើទាល ក្រុមប្រឹក្សាឃុំ មេភូមិឈើទាល ធ្វើការពិនិត្យលើជនរងគ្រោះ ។ បន្ទាប់ពីក្រុមការងារពិនិត្យរួចឃើញថា ដៃឆ្វេងរបស់រងគ្រោះមានស្នាមឆេះម្រាមដៃដោយឆក់ខ្សែភ្លើងជនរងគ្រោះពិតជាស្លាប់ដោយសារឆក់ខ្សែភ្លើងពិតប្រាកដមែន សាកសពជនរងគ្រោះត្រូវបានប្រគល់ជូនក្រុមគ្រួសារយកធ្វើបុណ្យតាមប្រពៃណី ៕