យោងតាមក្រសួងសុខាភិបាលនៃប្រទេសប្រេស៊ីលកាលពីថ្ងៃអាទិត្យកន្លងទៅនេះបានកត់ត្រាករណីអ្នកជំងឺ Covid-19 ដែលស្លាប់ថ្មីៗចំនួន៥៤១នាក់ក្នុងរយៈពេល ២៤ ម៉ោងកន្លងមក ដែលនាំឲ្យចំនួនអ្នកស្លាប់ឈានដល់ ៩៤,១០៤ នាក់ ។ នេះបើយោងតាមប្រភពពីទីភ្នាក់ងារសារព័ត៌មាន Global Times ដែលបានចេញផ្សាយនៅថ្ងៃទី០៣ ខែកក្កដា ឆ្នាំ២០២០ នេះ ។
ក្រសួងបាននិយាយថា ទន្ទឹមនឹងនេះការធ្វើតេស្តបានរកឃើញការឆ្លងថ្មីចំនួន ២៥,៨០០ ករណី ដែលធ្វើឲ្យចំនួនសរុបនៃអ្នកជំងឺដែលឆ្លង Covid-19 បានកើនឡើងដល់ ២,៧៣៣,៦៧៧ នាក់ ។
ប្រេស៊ីលបានក្លាយជាប្រទេសដែលរងការវាយប្រហារខ្លាំងជាងគេនៅអាមេរិកឡាទីន និងជាប្រទេសដែលរងការវាយប្រហារខ្លាំងជាងគេលំដាប់លេខ២នៅលើពិភពលោកបន្ទាប់ពីសហរដ្ឋអាមេរិក ទាំងការស្លាប់ និងចំនួននៃការឆ្លងជំងឺរាតត្បាត Covid-19 ។
រដ្ឋសៅប៉ូឡូ ដែលជារដ្ឋមានប្រជាជនច្រើនជាងគេបំផុតនៅក្នុងប្រទេសប្រេស៊ីលគឺជាចំណុចកណ្តាលនៃការផ្ទុះជំងឺនេះដោយមានអ្នកឆ្លងចំនួន ៥៥៨,៦៨៥ នាក់ និងមានអ្នកស្លាប់ ២៣,៣១៧ នាក់ បន្ទាប់មកគឺទីក្រុងរីយ៉ូដឺហ្សាណេរ៉ូមានអ្នកឆ្លង ១៦៧,២២៥ នាក់ និងអ្នកស្លាប់១៣,៥៧២នាក់ និងទីក្រុង Ceara មានអ្នកឆ្លង ១៧៦,៥៨០ ករណី និងអ្នកស្លាប់ ៧,៧០៩ នាក់ ៕
ប្រភព ៖ Global Times , ដោយ ៖ សំណាង