រាជធានីភ្នំពេញ ៖ ជនសង្ស័យ២នាក់បានធ្វើសកម្មភាពឆក់ទូរសព្ទដៃមួយគ្រឿងពីជនរងគ្រោះដែលកំពុងដើរបណ្តើរ និយាយទូរសព្ទបណ្តើររួចព្យាយាមរត់គេចខ្លួន តែត្រូវបានប្រជាពលរដ្ឋចាប់បានម្នាក់ រត់រួចម្នាក់ ។ ហេតុការណ៍នេះបង្កការភ្ញាក់ផ្អើលកាលពីវេលាម៉ោង ៨និង១០នាទីយប់ថ្ងៃទី២ ខែសីហា ឆ្នាំ២០២០ នៅចំណុចសួនច្បារ មុខក្រសួងការពារជាតិ តាមបណ្ដោយផ្លូវសហព័ន្ធរុស្ស៊ី សង្កាត់មិត្តភាព ខណ្ឌ៧មករា ។
តាមប្រភពបានឲ្យដឹងថា មុនពេលកើតហេតុគេឃើញជនរងគ្រោះដែលមិនស្គាល់អត្តសញ្ញាណមកលេងនៅចំណុចកើតហេតុខាងលើរួចក៏ដកទូរសព្ទម៉ាក១គ្រឿងម៉ាក Huawei មកនិយាយ ស្រាប់តែលេចមុខជនសង្ស័យចំនួនពីរនាក់ធ្វើដំណើរដោយថ្មើរជើងមកឆក់ទូរសព្ទដៃពីជនរងគ្រោះបានសម្រេចរួចព្យាយាមរត់គេចខ្លួន ។
ស្របពេលនោះជនរងគ្រោះស្រែកថា «ចោរៗ» ក៏ធ្វើឲ្យផ្អើលដល់បងប្អូនប្រជាពលរដ្ឋនាំគ្នាដេញឆ្លងទៅផ្លូវម្ខាងទៀតចូលដល់ទឹកដីសង្កាត់ស្រះចក ខណ្ឌដូនពេញ ទើបចាប់បានម្នាក់នាំគ្នាស្វាគមន៍ម្នាក់១ដៃ១ជើងឡើងទ្រោមខ្លួនសល់ដង្ហើមចង្រិតរួចទើបប្រគល់ជូនសមត្ថកិច្ចតែម្ដង ចំណែកបក្ខពួកម្នាក់ទៀតបានរត់គេចខ្លួនបាត់ ។
ក្រោយកើតហេតុជនរងគ្រោះត្រូវបានកម្លាំងសមត្ថកិច្ចនាំមកដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលមិត្តភាព ចំពោះជនសង្ស័យសមត្ថកិច្ចបានធ្វើការសួរនាំ និងធ្វើកំណត់ហេតុរួចបញ្ជូនបន្តដើម្បីចាត់ការទៅតាមនីតិវិធី ៕
