រាជធានីភ្នំពេញ ៖ នារីវ័យក្មេងម្នាក់បានធ្វើអត្តឃាតដោយចង.កសម្លាប់ខ្លួនជាមួយនឹងឥដ្ឋខ្យល់បង្កឱ្យមានការភ្ញាក់ផ្អើល កាលពីវេលាម៉ោង៩និង៣០នាទីយប់ ថ្ងៃទី៣១ ខែកក្កដា ឆ្នាំ២០២០ នៅក្នុងបន្ទប់ជួល ជាន់ទី២ ក្នុងភូមិត្រពាំងថ្លឹងទី២ សង្កាត់ ចោមចៅទី១ ខណ្ឌពោធិ៍សែនជ័យ ។ សពនារីខាងលើមានឈ្មោះ ស្រី ល័ក្ខ អាយុ២៦ឆ្នាំ ជាកម្មការនីរោងចក្រ មានស្រុកកំណើត នៅខេត្តព្រៃវែង។
បើតាមប្រភពពីប្អូនស្រីម្នាក់បានប្រាប់ឱ្យដឹងថា នារីខាងលើបានឡាយវីដេអូយំស្រែកហើយក៏ទៅចង.កសម្លាប់ខ្លួន ពេលនោះរូបគាត់ក៏ស្ទុះទៅមើលក៏ឃើញនារីនោះចង.កជាមួយខ្សែអង្រឹងជាមួយនឹងឥដ្ឋខ្យល់លើបង្អួចត្រដរខ្យល់ទៅហើយ ។ រូបគាត់ក៏រត់ទៅប្រាប់អ្នកជិតខាងឱ្យមកជួយតែកម្មអកុសលនារីរងគ្រោះបានស្លាប់បាត់ទៅហើយ ។
ប្រភពដដែលបានបន្តទៀតថា នារីរងគ្រោះខាងលើមុននឹងសម្លាប់ខ្លួនរូបគាត់បានឮសំឡេងឈ្លោះគ្នាជាមួយប្តីតែមិនដឹងឈ្លោះគ្នារឿងអីនោះទេ ក្រោយមកប្តីនោះបានចេញទៅបាត់ធ្វើឱ្យនារីរងគ្រោះខាងលើដាច់ចិត្តចង.កសម្លាប់ខ្លួនបែបនេះទៅ ។
ក្រោយមកសមត្ថកិច្ចបានចុះធ្វើកោសល្យវិច័យលើសពនារីរងគ្រោះ រួចក៏បានសន្និដ្ឋានថា នារីរងគ្រោះពិតជាស្លាប់ ដោយអត្តឃាតពិតប្រាកដមែន សពត្រូវបានយកទៅតម្កល់ទុកនៅវត្តទឹកថ្លារង់ចាំស្រាវជ្រាវរកសាច់ញាតិមកទទួលយកទៅធ្វើបុណ្យតាមប្រពៃណី ៕
