យោងតាមប្រភពពីក្រសួងសុខាភិបាលនៃប្រទេសវៀតណាមបានចេញសេចក្តីរាយការណ៍ពីការស្លាប់ទី៣របស់អ្នកឆ្លងជំងឺ Covid-19 នៅព្រឹកថ្ងៃសៅរ៍នេះ ដែលមានអាយុ៦៨ឆ្នាំ ជាស្ត្រីមានជំងឺមហារីកឈាម ។ នេះបើយោងតាមប្រភពពីទីភ្នាក់ងារសារព័ត៌មានវៀតណាម dtinews ដែលបានចេញផ្សាយនាព្រឹកថ្ងៃទី០១ ខែសីហា ឆ្នាំ២០២០ នេះ ។
ស្ត្រីដែលជាមនុស្សទី៣ដែលបានស្លាប់ដោយសារជំងឺកូវីដ១៩នេះជាអ្នកជំងឺទី៤៩៩ដែលបានឆ្លងកូវីដ១៩មកពីកណ្តាលទីក្រុងដាណាង ដែលជាកន្លែងស្ថិតក្នុងចំណោមអ្នកឆ្លងកូវីដថ្មីចំនួន៩២ករណីទៀតដែលរដ្ឋាភិបាលបានរកឃើញតាំងពីសប្តាហ៍មុន ។
មុនពេលឆ្លងមេរោគកូវីដ១៩ស្ត្រីរូបនេះបានរងផលប៉ះពាល់ពីជំងឺមហារីកឈាម, ជំងឺលើសឈាម និងជំងឺទឹកនោមផ្អែម ដែលបណ្តាលឱ្យមានជំងឺមហារីកខួរក្បាលនៅដំណាក់កាលចុងក្រោយ និងជំងឺរលាកសួតធ្ងន់ធ្ងរថែមទៀត ។
ស្ត្រីរូបនេះបានស្នាក់នៅមន្ទីរពេទ្យដាណាងតាំងពីថ្ងៃទី១៨ ដល់ថ្ងៃទី២៣ ខែកក្កដា ឆ្នាំ២០២០ បន្ទាប់មកនាងមានអាការៈក្តៅខ្លួន ហើយត្រូវបានប្តូរទៅមន្ទីរពេទ្យ Danang Oncology នៅថ្ងៃបន្ទាប់ដែលនាងត្រូវបានគេធ្វើតេស្តវិជ្ជមានសម្រាប់កូវីដ១៩ ក្រោយមកនៅរសៀលថ្ងៃសុក្រស្ថានភាពរបស់ស្ត្រីរូបនេះកាន់តែយ៉ាប់យ៉ឺនហើយត្រូវក្រុមគ្រូពេទ្យប្រើបំពង់ខ្យល់អុកស៊ីសែនដើម្បីជំនួយ ។
អ្នកជំនាញមកពីក្រសួងសុខាភិបាលបានធ្វើការពិគ្រោះយោបល់ស្តីពីការព្យាបាលលើស្ត្រីរូបនេះ តែទោះជាយ៉ាងណាក៏ដោយមិនបានទទួលជោគជ័យនោះទេ ក្រោយមកស្ត្រីរូបនេះក៏បានទទួលមរណភាពកាលពីព្រឹកព្រលឹមថ្ងៃទី១ ខែសីហា ឆ្នាំ២០២០ នេះតែម្តង ។
បើតាមប្រភពីសាស្ត្រាចារ្យ Nguyen Gia Binh អតីតប្រធានផ្នែកថែទាំសុខភាព នៃមន្ទីរពេទ្យបាកម៉ៃ នៅទីក្រុងហាណូយ បាននិយាយថា ការស្លាប់របស់ស្ត្រីរូបនេះមិនមែនដោយសារជំងឺកូវីដ១៩ទេ ប៉ុន្តែភាគច្រើនជាផលវិបាកទាក់ទងនឹងជំងឺមហារីកឈាម ។
សូមបញ្ជាក់ផងដែរថា ការស្លាប់ចំនួនពីរករណីដំបូងរបស់ប្រទេសវៀតណាមដែលជាអ្នកឆ្លងជំងឺកូវីដ១៩ ទី៤២៨ និង៤៣៧ ដែលក្រសួងសុខាភិបាលបានប្រកាសកាលពីថ្ងៃសុក្រ ក៏សុទ្ធសឹងបណ្តាលមកពីជំងឺរ៉ាំរ៉ៃដូចជា ជំងឺលើសឈាម ខ្សោយតំរងនោម និងទឹកនោមផ្អែម ៕
ប្រភព ៖ dtinews , ដោយ ៖ សំណាង