យោងតាមប្រធានមន្ទីរវប្បធម៌ និងកីឡា ទីក្រុងហាណូយលោក To Van Dong បានឱ្យដឹងថា DJ ស្រីដ៏ល្បីរបស់វៀតណាមដែលគេស្គាល់ថា DJ Ngan 98 នឹងត្រូវព្យួរការងាររបស់ខ្លួនរយៈពេល៤ខែ នៅទីក្រុងហាណូយ និងកន្លែងដែលនាងសម្តែង ហើយត្រូវផាកពិន័យជាប្រាក់ចំនួន៤០លានដុង (១,៧៣៩ ដុល្លារ) ក្រោយពី DJ ស្រីរូបនេះសម្តែងនៅក្នុងកម្មវិធីមួយដែលនាងបញ្ចេញភាពសិចស៊ីជ្រុល ដោយបានដោះសំលៀកបំពាក់រួចបិទបាំងប្រដាប់ភេទរបស់នាងតែបន្តិចប៉ុណ្ណោះ ។ នេះបើយោងតាមប្រភពពីទីភ្នាក់ងារសារព័ត៌មាន Vietnam Insider ដែលបានចេញផ្សាយកាលពីថ្ងៃទី៣០ ខែកក្កដា ឆ្នាំ២០២០ កន្លងទៅនេះ ។
បើយោងតាមរបាយការណ៍ពីនាយកដ្ឋានបានបង្ហាញថា កាលពីថ្ងៃទី២៣ ខែកក្កដា ឆ្នាំ២០២០ វីដេអូឃ្លីបមួយត្រូវបានគេបង្ហោះពេញបណ្តាញសង្គមបង្ហាញពីសកម្មភាពសម្តែងរបស់ DJ Ngan 98 នៅអាងទឹកនៃពិធីជប់លៀងមួយនៅក្នុងក្លិបកំសាន្ត New Star 3 ដោយស្លៀកឈុតប៊ីគីនីខ្នាតតូចបិទបាំងតែប្រដាប់ភេទតែបន្តិចប៉ុណ្ណោះដែលវាផ្ទុយទៅនឹងវប្បធម៌នៃច្បាប់របស់ប្រទេស ។
មន្ត្រីនៃនាយកដ្ឋានបានថា ៖«នេះគ្រាន់តែជាការពិន័យជាបណ្តោះអាសន្នប៉ុណ្ណោះ ។ យើងនឹងស្នើទៅក្រសួងវប្បធម៌កីឡា និងទេសចរណ៍ អនុវត្តការព្យួររាល់សកម្មភាពរបស់នាងនៅទូទាំងប្រទេស» ។
តាមប្រភពនាយកដ្ឋានក៏បានឱ្យដឹងទៀតថា ក្រុមរាំងរបស់ DJ Ngan 98 ចំនួន៨នាក់ផ្សេងទៀតដែលចូលរួមក្នុងកម្មវិធីនេះក៏នឹងត្រូវផ្អាកការងាររយៈពេល៤ខែដូចគ្នា ដោយសារការស្លៀកឈុយតប៊ីគីនីសិចស៊ីពេលសម្តែងជាមួយគ្នា ៕
ប្រភព ៖ Vietnam Insider , ដោយ ៖ សំណាង
