ទីក្រុងប៊ីងហ្គូរូ ៖ ប្រទេសឥណ្ឌាបានរាយការណ៍ពីការកើនឡើងនូវចំនួនករណីឆ្លងជំងឺកូវីដ១៩ថ្មីប្រចាំថ្ងៃនៅថ្ងៃសុក្រនេះដោយពេលនេះឥណ្ឌាមានឆ្លងជំងឺកូវីដ១៩សរុប ១,៦៤ លាននាក់ហើយ នៅពេលដែលរដ្ឋាភិបាលបានបន្ធូរបន្ថយការទប់ស្កាត់វីរុសរាតត្បាតនេះក្នុងគោលបំណងស្តារសេដ្ឋកិច្ចឱ្យមានភាពល្អប្រសើរឡើងវិញ ខណៈពេលដែលកំពុងព្យាយាមបង្កើនការធ្វើតេស្ដជារៀងរាល់ថ្ងៃ ។ នេះបើយោងតាមប្រភពពីទីភ្នាក់ងារសារព័ត៌មាន Reuters ដែលបានចេញផ្សាយនៅរសៀលថ្ងៃទី៣១ ខែកក្កដា ឆ្នាំ២០២០ នេះ ។
ក្រសួងសុខាភិបាលនៃប្រទេសឥណ្ឌាបាននិយាយនៅលើគេហទំព័រផ្លូវការរបស់ខ្លួនថា អ្នកឆ្លងជំងឺកូវីដ១៩បានកើនឡើងដល់ទៅ៥៥,០៧៨ករណីក្នុងរយៈពេលត្រឹមតែ២៤ម៉ោង ខណៈចំនួនអ្នកស្លាប់បានកើនឡើងពី៧៧៩នាក់ដល់ ៣៥,៧៤៧ នាក់ ។
ក្រសួងក៏បាននិយាយផងដែរថា ខ្លួនមានគោលបំណងបង្កើនសមត្ថភាពវិស័យសុខាភិបាលរបស់ប្រទេសនេះបន្ថែមដើម្បីធ្វើតេស្តរកមេរោគឆ្លងកូវីដ១៩លើចំនួនមនុស្ស១លាននាក់ក្នុងមួយថ្ងៃ និងបានធ្វើតេស្តលើមនុស្សចំនួន៦០០,០០០នាក់ហើយនៅថ្ងៃសុក្រនេះ ។
សូមបញ្ជាក់ផងដែរថា រដ្ឋាភិបាលនៃប្រទសឥណ្ឌានៅសប្តាហ៍នេះបានប្រកាសបើកសាលារៀន និងកន្លែងហាត់កាយសម្ព័ន្ធឡើងវិញ ហើយបានលុបចោលការរឹតបន្តឹងលើវិធានការទប់ស្កាត់ការរីករាលដាននៃជំងឺឆ្លងកូវីដ១៩ផងដែរក្នុងគោលបំណងដើម្បីស្តារសេដ្ឋកិច្ចជាតិឡើងវិញ ៕
ប្រភព ៖ Reuters , ដោយ ៖ សំណាង
