កាលពីដើមសប្តាហ៍នេះនាយកប្រតិបត្តិក្រុមហ៊ុនបច្ចេកវិទ្យាជីវសាស្ត្ររបស់សហរដ្ឋអាមេរិកឈ្មោះ Moderna Stephane Bancel បានប្រកាសថា ពួកគេបានចាប់ផ្តើមសាកល្បងដំណាក់កាលទី៣ នៃការចាក់វ៉ាក់សាំងប្រឆាំងនឹងជំងឺរាតត្បាតកូវីដ-១៩ហើយ ។ នេះបើយោងតាមប្រភពពីទីភ្នាក់ងារសារព័ត៌មាន Sputniknews ដែលបានចេញផ្សាយនៅរសៀលថ្ងៃទី២៩ ខែកក្កដា ឆ្នាំ២០២០ នេះ ។
កាសែត Financial Times (FT) បានដកស្រង់ប្រភពដែលមិនបញ្ចេញឈ្មោះបាននិយាយថា ក្រុមហ៊ុនជីវបច្ចេកវិទ្យារបស់សហរដ្ឋអាមេរិកឈ្មោះថា Moderna គ្រោងនឹងដាក់តម្លៃវ៉ាក់សាំង COVID-19 របស់ខ្លួនក្នុងតម្លៃប្រហែលពី ៥០ ទៅ ៦០ ដុល្លារក្នុងមួយវគ្គតែក្រុមហ៊ុននេះមិនបានបញ្ជាក់នោះទេថាតើការចាក់វ៉ាក់សាំងប្រឆាំងជំងឺឆ្លងកូវីដ១៩នេះមានប៉ុន្មានវគ្គដោយអះអាងថា វាជាការសម្ងាត់របស់ក្រុមហ៊ុន ។ ការស្នើសុំតម្លៃចាក់វ៉ាក់សាំងដែលគេឱ្យឈ្មោះថា mRNA-1273 នឹងត្រូវអនុវត្តចំពោះសហរដ្ឋអាមេរិក និងប្រទេសដែលមានប្រាក់ចំណូលខ្ពស់ ។
ទីភ្នាក់ងារព័ត៌មានរ៉យទ័របានដកស្រង់ចេញផ្សាយថា តម្លៃចុងក្រោយសម្រាប់វ៉ាក់សាំងម៉ូស្តាណាមិនទាន់ត្រូវបានកំណត់នៅឡើយទេ ខណៈដែលក្រុមហ៊ុនបានបន្តពិភាក្សាជាមួយរដ្ឋាភិបាលអំពីការផ្គត់ផ្គង់វ៉ាក់សាំង mRNA-1273 ។
អ្នកនាំពាក្យរបស់ក្រុមហ៊ុនជីវបច្ចេកវិទ្យារបស់សហរដ្ឋអាមេរិកបានបដិសេធមិនផ្តល់ព័ត៌មានលម្អិតស្តីពីការកំណត់តម្លៃដែលសម្រាប់ដាក់ចេញជាសាធារណៈដោយបាននិយាយថា វាជាការសម្ងាត់ព្រោះទាក់ទងទៅនឹងកិច្ចពិភាក្សា និងកិច្ចសន្យា ។
ក្រុមហ៊ុនជីវបច្ចេកវិទ្យា Moderna Stephane Bancel រួមជាមួយវិទ្យាស្ថានសុខភាពជាតិអាមេរិក (NIH) ដែលចាប់ផ្តើមការសាកល្បងដំណាក់កាលទី៣ ដោយឱ្យឈ្មោះថា COVE (Coronavirus Efficacy) នៃប្រសិទ្ធិភាពវ៉ាក់សាំង mRNA-1273 ដែលនឹងមានអ្នកចូលរួមប្រហែលជា៣០០០០នាក់នៅសហរដ្ឋអាមេរិក ។
សេចក្តីថ្លែងការណ៍នេះត្រូវបានធ្វើឡើងមុនការប្រកាសរបស់ក្រុមហ៊ុនថា ខ្លួនបានទទួលប្រាក់ចំនួន ៤៧២ លានដុល្លារពីអាជ្ញាធរស្រាវជ្រាវ និងអភិវឌ្ឍន៍ជីវសាស្ត្រ (BARDA) របស់រដ្ឋាភិបាលសហរដ្ឋអាមេរិកដើម្បីគាំទ្រដល់ការស្រាវជ្រាវដែលទាក់ទងនឹងវ៉ាក់សាំងការពារជំងឺឆ្លងកូវីដ-១៩ដែលគេហៅថាវ៉ាក់សាំង mRNA-1273 ហើយកាលពីខែមេសាកន្លងទៅនេះក្រុមហ៊ុនបច្ចេកវិទ្យាជីវសាស្ត្រ Moderna ក៏បានទទួលទឹកប្រាក់ចំនួន ៤៨៣ លានដុល្លារផងដែរពី BARDA ។
នៅក្នុងការអភិវឌ្ឍដាច់ដោយឡែកមួយកាលពីសប្តាហ៍មុនរដ្ឋាភិបាលសហរដ្ឋអាមេរិកត្រូវបានគេរាយការណ៍ថា បានចំណាយថវិកាចំនួន ១,៩៥ ពាន់លានដុល្លារសម្រាប់ផលិតវ៉ាក់សាំងការពារមេរោគកូវីដ១៩ចំនួន១០០លានដូសដែលត្រូវបានបង្កើតឡើងដោយក្រុមហ៊ុន Pfizer ចាប់ដៃគូរសហការជាមួយក្រុមហ៊ុន BioNTech ជាមួយនឹងជម្រើសផលិតបន្ថែមដល់ទៅ ៥០០ លានដូសទៀតនៅថ្ងៃក្រោយ ។
រដ្ឋាភិបាលសហរដ្ឋអាមេរិកក៏បានប្តេជ្ញាចិត្តទម្លាក់កញ្ចប់ថវិការរហូតដល់ ១,២ ពាន់លានដុល្លារដល់ក្រុមហ៊ុនផលិតឱសថយក្ស អង់គ្លេស-ស៊ុយអែត គឺក្រុមហ៊ុន AstraZeneca ដើម្បីគាំទ្រការងារផលិតវ៉ាក់សាំងប្រឆាំងកូវីដ១៩របស់សាកលវិទ្យាល័យ Oxford ៕
ប្រភព ៖ Sputniknews , ដោយ ៖ សំណាង