កាលពីពេលថ្មីៗនេះក្រុមហ៊ុនបច្ចេកវិទ្យាយក្សចិន Huawei បានប្រឈមនឹងការហាមឃាត់នៅចក្រភពអង់គ្លេសបន្ទាប់ពីគណៈរដ្ឋមន្ត្រីអង់គ្លេសបានធ្វើការសម្រេចចិត្តលើកិច្ចព្រមព្រៀងបច្ចេកវិទ្យា 5G ជាមួយក្រុមហ៊ុន Huawei ដោយលើកឡើងពីកង្វល់ផ្នែកសន្តិសុខ ។
ក្នុងពេលជាមួយគ្នានេះតាមសេចក្តីរាយការណ៍ទីក្រុងឡុងបានជូនដំណឹងដល់ Huawei ថា វិធានការនេះត្រូវបានធ្វើឡើងបន្ទាប់ពីរដ្ឋបាលអាមេរិកដាក់សម្ពាធលើរដ្ឋាភិបាលអង់គ្លេស ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយនៅថ្ងៃទី២១ ខែកក្កដា ឆ្នាំ២០២០ នេះ។
រដ្ឋមន្ត្រីក្រសួងហិរញ្ញវត្ថុបារាំងលោក Bruno Le Maire នៅថ្ងៃអង្គារនេះបានប្រកាសថា ទីក្រុងប៉ារីសនឹងមិនហាមឃាត់ក្រុមហ៊ុន Huawei មិនឱ្យវិនិយោគនៅបារាំងទេនៅពេលដែលយុទ្ធនាការសកលធ្វើឡើងដោយសហរដ្ឋអាមេរិកប្រឆាំងនឹងក្រុមហ៊ុននេះ ។
លោកបានប្រកាស Bruno Le Maire ថា ៖«យើងមិនហាមឃាត់ក្រុមហ៊ុន Huawei មិនឱ្យវិនិយោគលើប្រព័ន្ធ 5G ទេព្រោះយើងមិនរាប់បញ្ចូលការរើសអើងប្រឆាំងនឹងប្រតិបត្តិករណាមួយឡើយ» ។
សហរដ្ឋអាមេរិកបានដាក់ក្រុមហ៊ុន Huawei ក្នុងបញ្ជីខ្មៅនៅតាំងពីខែឧសភា ឆ្នាំ២០១៩ ជុំវិញការចោទប្រកាន់ថាផ្នែករឹង និងសូហ្វវែររបស់ក្រុមហ៊ុនត្រូវបានប្រើសម្រាប់ធ្វើចារកម្មក្នុងនាមទីភ្នាក់ងារស៊ើបការណ៍សម្ងាត់របស់ប្រទេសចិន ដោយជំរុញឱ្យប្រទេសដទៃទៀតអនុវត្តតាម និងព្រមានថាការដាក់ទណ្ឌកម្មអាចត្រូវបានអនុវត្តប្រឆាំងនឹងអ្នកដែលសហការជាមួយក្រុមហ៊ុនបច្ចេកវិទ្យាយក្សរបស់ចិនមួយនេះ ។ ទាំងទីក្រុងប៉េកាំង និងក្រុមហ៊ុន Huawei បានច្រានចោលការអះអាងនេះ ដោយបញ្ជាក់ថាចំណាត់ការនេះគឺជារឿងនយោបាយសុទ្ធសាធ ៕
ប្រភព ៖ Sputnik , ដោយ ៖ សំណាង
