រាជធានីភ្នំពេញ ៖ ក្រុមប្រឹក្សាជំនុំជម្រះ នៃតុលាការក្រុងភ្នំពេញ បានក្រើនរំលឹកដល់ លោក កឹម សុខា អតីតប្រធានគណបក្សសង្គ្រោះជាតិ ដែលត្រូវចោទប្រកាន់ពីទោសក្បត់ជាតិថា កុំឲ្យធ្វើសកម្មភាពហួសព្រំដែនកំណត់ពីព្រោះលោកស្ថិតនៅក្រោមការត្រួតពិនិត្យតាមផ្លូវតុលាការ ។
ការក្រើនរំលឹកបែបនេះ បន្ទាប់ពីថ្មីៗកន្លងមកនេះ ជនជាប់ចោទបានធ្វើសកម្មភាពមួយចំនួន ជាពិសេសនៅតាមបណ្ដាខេត្ត បានចុះជួបសំណេះសំណាលជាមួយប្រជាពលរដ្ឋ ក៏ដូចជាការប្រមូលផ្ដុំ ជួបជុំជាមួយអ្នកគាំទ្ររបស់ខ្លួន ក្រោមរូបភាពផ្សេងៗ ទៅកាន់ខេត្តសៀមរាប ខេត្តត្បូងឃ្មុំជាដើម។
ដូច្នេះក្រុមប្រឹក្សាជំនុំជម្រះ កត់សម្គាល់ឃើញថា សកម្មភាពទាំងអស់នេះ អាចនឹងឈានទៅហួសព្រំដែន ឬនាំទៅដល់ ការបំពានលើកាតព្វកិច្ច នៃការត្រួតពិនិត្យតាមផ្លូវតុលាការ ដែលតម្រូវដាក់លើជនជាប់ចោទ ។
នៅក្នុងលិខិតមួយចុះថ្ងៃទី២០ ខែកក្កដា ឆ្នាំ២០២០ និងចុះហត្ថលេខាដោយលោក កូយ សៅ ប្រធានក្រុមប្រឹក្សាជំនុំជម្រះនៃតុលាការក្រុងភ្នំពេញ បានប្រាប់លោក កឹម សុខា តាមសេចក្តីសម្រេចដីការបស់តុលាការកន្លងមក លោក កឹម សុខាដែលជាជនត្រូវជាប់ចោទជាប់កាតព្វកិច្ចជាក់លាក់មួយចំនួន ជាពិសេសមិនត្រូវសកម្មភាពនយោបាយឡើយ ។
លោក កឹម សុខា ត្រូវបានសមត្ថកិច្ចចាប់ខ្លួនទាំងកណ្ដាលអធ្រាត្រ កាលថ្ងៃទី០៣ ខែកញ្ញា ឆ្នាំ២០១៧ នៅឯគេហដ្ឋានរបស់លោក នៅម្ដុំខណ្ឌទួលគោក។ តុលាការបានចោទប្រកាន់លោក ថា ក្បត់ជាតិនិងឃុបឃិតជាមួយរដ្ឋបរទេស។ លោកបានជាប់ឃុំនៅមន្ទីរឃុំឃាំងត្រពាំងថ្លុង ក្នុងខេត្តត្បូងឃ្មុំហើយក្រោយមកតុលាការកែប្រែសេចក្តីសម្រេចដោយអនុញ្ញាតឲ្យលោក មកនៅស្នាក់ក្នុងផ្ទះ របស់ខ្លួន ដោយស្ថិតនៅក្រោមការត្រួតពិនិត្យតាមផ្លូវតុលាការជាមួយលក្ខខណ្ឌ មួយចំនួនដូចជាមិនត្រូវធ្វើសកម្មភាពនយោបាយជាដើមនោះ។
តាមចំណុច២ នៃសេចក្ដីសម្រេច នៃដីកាបញ្ជូនទៅជំនុំជម្រះលេខ ៦៤០០ «គ» ដ.ដ ចុះថ្ងៃទី០២ ខែធ្នូ ឆ្នាំ២០១៩ និងដីកាសម្រេចកែប្រែការត្រួតពិនិត្យតាមផ្លូវតុលាការលេខ ៨៨០៤ «គ» ដ.ព.ស ចុះថ្ងៃទី១០ ខែវិច្ឆិកា ឆ្នាំ២០១៩ របស់ចៅក្រមស៊ើបសួរនៃសាលាដំបូងរាជធានីភ្នំពេញ បានសម្រេចបន្តដាក់ជនត្រូវចោទឱ្យជាប់កាតព្វកិច្ចជាក់លាក់មួយចំនួន ជាពិសេសហាមជនត្រូវចោទមិនត្រូវធ្វើសកម្មភាពនយោបាយនោះឡើយ។
ដើម្បីធានាបាននូវការគោរពចំពោះកាតព្វកិច្ចនៃការត្រួតពិនិត្យតាមផ្លូវតុលាការ ក៏ដូចជាសន្តិសុខផ្ទាល់ខ្លួន និងផលប្រយោជន៍ស្របច្បាប់របស់ជនជាប់ចោទសម្រាប់សវនាការបន្ត នាពេលខាងមុខនេះ ក្រុមប្រឹក្សាជំនុំជម្រះ ធ្វើការក្រើនរំលឹក ជនជាប់ចោទ ត្រូវមានស្មារតីគោរពឱ្យបានហ្មត់ចត់ ម៉ឺងម៉ាត់ និងត្រូវប្រកាន់ភ្ជាប់នូវកាតព្វកិច្ចដែលតុលាការ បានតម្រូវដាក់លើ ជនជាប់ចោទ ដូចមាននៅក្នុងដីកាសម្រេចខាងលើនេះ ហើយដែលមានអានុភាពរហូតដល់ពេលសាលក្រមត្រូវបានប្រកាសស្រប តាមបញ្ញត្តិមាត្រា ៣៥២ នៃក្រមនីតិវិធីព្រហ្មទណ្ឌ ៕