រាជធានីភ្នំពេញ ៖ សែន សន្តិភាព គឺជាឈ្មោះថ្មីរបស់លោក ខេមប៊ែល ភីធឺ ម៉ាក ជនជាតិអូស្រាលី អាយុ៦៤ឆ្នាំ ដែលសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា បានផ្តល់ជូនគាត់ ដែលមានបំណងចង់ក្លាយជាជនជាតិកម្ពុជា និងរស់នៅកម្ពុជារហូតដល់ថ្ងៃស្លាប់ ។
បើយោងតាមផេកហ្វេសបុកផ្លូវការរបស់លោក ដួង តារា ជំនួយការផ្ទាល់សម្តេចតេជោនាយករដ្ឋមន្ត្រីបានបង្ហោះ នាព្រឹកថ្ងៃទី ២០ ខែកក្កដានេះ ឲ្យដឹងថា ព្រះមហាក្សត្រកម្ពុជា បានឡាយព្រះហស្ដលេខាកាលពីថ្ងៃទី១៧ កក្កដា ២០២០នេះ ផ្តល់សញ្ជាតិកម្ពុជាជូនលោក ខេមប៊ែល ភីធឺ ម៉ាក តាមសញ្ជាតូបនីយកម្ម ដែលមានឈ្មោះថា សែន សន្តិភាព ។
លោក ដួង តារា បានសរសេរនៅលើហ្វេសបុកថា «សង្ឃឹមថា ចាប់ពីពេលនេះទៅ លោកសន្តិភាព នឹងបានរស់នៅមានសេចក្តីសុខ ហើយមានសិទ្ធិពេញលេញក្នុងនាមជាពលរដ្ឋខ្មែរ ដែលជាឱកាសសម្រាប់ជីវិតរស់នៅចុងក្រោយលើទឹកដីកម្ពុជា! ខ្ញុំបាទសូមគោរពអរគុណសម្តេចតេជោ ប្រមុខដឹកនាំ ចំពោះក្តីមេត្តាករុណានិងក្តីស្រឡាញ់ដ៏ធំធេងបំផុត ដែលសម្តេចតែងតែមានចំពោះពលរដ្ឋទូទៅដោយគ្មានការរើសអើងអ្វីឡើយ ។ យើងចូលរួមកសាងអំពើល្អ ចែករំលែកក្តីស្រឡាញ់និងស្នាមញញឹម និងសូមមានចិត្តអាណិតស្រឡាញ់ពលរដ្ឋយើងគ្រប់ទីកន្លែង» ។
សូមជម្រាបថា កាលពីថ្ងៃទី៩ កក្កដា លោកដួង តារា បានចូលរួមសម្របសម្រួលផ្សះផ្សាបញ្ចប់វិវាទ ររវាងលោក ខាំបែល ភីថឺម៉ាក Cambell Peter Mark ជនជាតិអូស្ត្រាលី ដែលបានមកទិញដី ធ្វើរមណីយដ្ឋាន នៅខេត្តកំពត និងអតីតមិត្តស្រីគាត់ឈ្មោះ ត្រា ចាន់ស្រីលីន ។ លោកCambell Peter Mark ទទួលបានប្រាក់ដើមវិនិយោគជាង ៥២ម៉ឺនដុល្លារមកវិញ បូកនឹងប្រាក់ចំណេញមួយចំនួន ដែលនឹងទទួលបានពីការលក់អចលទ្រព្យ សង្ឃឹមថា លោកនឹងបានរស់នៅសុខសប្បាយសម្រាប់ជីវិតចុងក្រោយក្នុងប្រទេសកម្ពុជា ។ ចំណែកប្អូនស្រី ត្រា ចាន់ស្រីលីន វិញទទួលបានកាណូតទេសចរណ៍១គ្រឿង និងប្រាក់ចំណេញពីការលក់ដី (ម្នាក់ៗ ទទួលបាន៥០% អំពីប្រាក់ចំណេញលក់ដី២កន្លែង) ។
លោក Cambell Peter Mark (សែន សន្តិភាព) បានជួបរឿងអយុត្តិធ៌មមួយ ដោយបានជឿទុកចិត្តទៅលើមិត្តស្រី ជាជនជាតិខ្មែរម្នាក់ ឲ្យឈរឈ្មោះទិញអចលនទ្រព្យមួយចំនួន នៅខេត្តកំពត ដើម្បីធ្វើជារមណីយដ្ឋាន តែចុងក្រោយមិត្តស្រីរបស់គាត់ បានលក់ដីនោះអស់ ។ ដោយទទួលរងនូវភាពអយុត្តិធ៌ម បែបនេះ បុរសជនជាតិអូស្ត្រាលីរូបនេះ បានគោរពសំពះស្នើសុំក្តីសង្គ្រោះពីសម្តេចអគ្គមហាសេនាបតីតេជោ ហ៊ុន សែន ជួយដោះស្រាយ និងមេត្តាផ្តល់សញ្ជាតិខ្មែរជូនគាត់ ដើម្បីបន្តរស់ នៅក្នុងជីវិតចុងក្រោយ ជាជនជាតិខ្មែរ និងមានសិទ្ធិពេញលេញក្នុងការទិញដូរអចលនទ្រព្យដោយស្របច្បាប់ ។
បន្ទាប់ពីបានពិនិត្យរបាយការណ៍ស្នើសុំរបស់លោក ដួង តារា រួចហើយ សម្តេចអគ្គមហាសេនាបេតីតេជោ ហ៊ុន សែន នាយករដ្ឋមន្ត្រីកម្ពុជាបានសម្រេចក្រាបបង្គំ ទូលថ្វាយព្រះករុណាព្រះមហាក្សត្រ នៃកម្ពុជា ដើម្បីស្នើសុំផ្តល់សញ្ជាតិកម្ពុជា ជូនដល់លោក Peter ដែលមានឈ្មោះខ្មែរថា សែន សន្តិភាព Sen Santepheap ។
លោក សែន សន្តិភាព បានរៀបរាប់ដោយក្តីរំភើបទាំងទឹកភ្នែករលីងរលោងថា៖« សម្តេចតេជោ ហ៊ុន សែន គឺពិតជាទេវតារស់នៅលើដីកម្ពុជាយ៉ាងពិតប្រាកដ។សម្តេចតេជោបាន ជប់រូបខ្ញុំ ឲ្យក្លាយជាពលរដ្ឋខ្មែរថ្មីមួយរូបនៅកម្ពុជា សម្តេចមិនត្រឹមតែជាមេដឹកនាំដ៏ល្អនោះទេ តែជាប្រមុខការទូតដ៏ឆ្នើមមួយដែលបានធ្វើឲ្យប្រទេសកម្ពុជារីកចម្រើនរុងរឿងថ្កើងថ្កានទៅមុខឥតឈប់ឈរ និងមានទំនាក់ទំនងការទូតល្អឥតខ្ចោះជាមួយប្រទេសជាមិត្ត។សម្តេចតេជោតែងតែមានក្តីស្រឡាញ់និងគិតគូរពីសុខទុក្ខប្រជាប្រពលរដ្ឋគ្រប់ស្រទាប់វណ្ណៈព្រមទាំងសុខទុក្ខជនបរទេសទាំងអស់នៅកម្ពុជាផងដែរ» ៕