រាជធានីភ្នំពេញ ៖ លោកបណ្ឌិតសភាចារ្យ រស់ ចន្ត្រាបុត្រ ទីប្រឹក្សាផ្ទាល់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កំពុងឈឺធ្ងន់ ហើយកំពុងសង្គ្រោះបន្ទាន់ ផ្នែកបេះដូង នៃមន្ទីរពេទ្យកាល់ម៉ែត្រ ២ថ្ងៃមកហើយ។
តាមគណនីរបស់ Chea Vanny (ពុទ្ធិកា) ដែលអះអាងថា ជាកូនធម៌របស់លោកបណ្ឌិត រស់ ចន្ត្រាបុត្រ បានសរសេរនៅម៉ោង៦ល្ងាចថ្ងៃទី១៣ កក្កដា នេះថា «នាងខ្ញុំសូមថ្លែងអំណរគុណយ៉ាងជ្រាលជ្រៅចំពោះឯកឧត្តម លោកជំទាវ លោក លោកស្រី អ្នកនាងកញ៉ាទាំងអស់ដែលបានជូនពរលោកប៉ា រស់ ចន្ត្រាបុត្រ ដែលលោកកំពុងស្ថិតនៅក្នុងអគារសង្គ្រោះបន្ទាន់ផ្នែកបេះដូងនៃមន្ទីរពេទ្យកាល់ម៉ែត្រ ហើយស្ថានភាពនៃជំងឺរបស់លោក គឺត្រូវការធ្វើការវះកាត់ជាបន្ទាន់ និងត្រូវការឈាមច្រើនដើម្បីប្រតិបត្តិការ»។
គណនីដដែលបានសរសេរទៀតថា «ដូច្នេះបើសិនជាលោក លោកស្រី អ្នកនាងកញ្ញាមានចិត្តសប្បុរសបរិច្ចាកឈាមជូនលោក នាងខ្ញុំជាកូនធម៌ក៏ដូចជាក្រុមគ្រួសារសូមថ្លែងអំណរអរគុណទុកជាមុននូវសមានចិត្តសប្បុរសរបស់លោកអ្នក និងសូមបួងសួងគោរពជូនពរលោកអ្នក សូមមានសុខភាពល្អ និងជោគជ័យការងារគ្រប់ពេលវេលា» ៕