រាជធានីភ្នំពេញ ៖ យុវតីម្នាក់កំពុងធ្វើដំណើរតាមដងផ្លូវជូនបងស្រីទៅកាន់រោងចក្រ ខណៈពេលកំពុងធ្វើដំណើរមានអាការៈវិលមុខក៏បានបុកពីក្រោយម៉ូតូកង់បីដែលឈប់ចតនៅចិញ្ចើមផ្លូវបណ្តាលឲ្យរបួសធ្ងន់បាក់ជើងស្តាំ ។ ហេតុការណ៍នេះ បានកើតទ្បើងកាលពីវេលាម៉ោង ៦និង៤៥នាទីព្រឹក ថ្ងៃទី១៣ ខែកក្កដា ឆ្នាំ២០២០ ស្ថិតតាមមហាវិថីឈ្នះ ឈ្នះ ចំណុចភូមិត្រពាំងធ្នង់ សង្កាត់សំរោងក្រោម ខណ្ឌពោធិសែនជ័យ ។
យុវតីរងគ្រោះឈ្មោះ សេង ប៊ុនឡុង អាយុ១៦ឆ្នាំ មានទីលំនៅ ភូមិត្រពាំងអញ្ចាញ១ សង្កាត់ត្រពាំងក្រសាំង ខណ្ឌពោធិសែនជ័យ រងរបួសធ្ងន់បាក់ជើងស្តាំ ។
តាមប្រភពពីក្រុមគ្រួសារបានឲ្យដឹងថា ខណៈដែលសាច់ញាតិ បងប្អូនគ្រួសារ កំពុងមានទុក្ខជាទម្ងន់ ដោយសារម្តាយរបស់ជនរងគ្រោះបានទទួលមរណៈភាព ហើយក៏កំពុងធ្វើបុណ្យផងដែរ ស្រាប់តែនៅព្រឹកថ្ងៃទី១៣ ខែកក្កដា នេះយុវតីរងគ្រោះបានជិះម៉ូតូម៉ាកធូដេ ពណ៌ស ពាក់ផ្លាកលេខ ភ្នំពេញ 1HR-6281 ឌុបបងស្រីទៅរោងចក្រ ។
លុះពេលវិលត្រឡប់មកវិញធ្វើដំណើរតាមមហាវិថី ឈ្នះ-ឈ្នះ ពីជើងទៅត្បូងបានបើកលឿនប្រញាប់ទៅផ្ទះវិញក៏មានអាការៈងងឹតវិលមុខទើបធ្វើឲ្យរេចង្កូតធ្លាក់ទៅចិញ្ចើមជ្រុលទៅបុកពីក្រោយម៉ូតូកង់បីដែលចតឈប់ស្ងៀម (ម្ចាស់ចុះបត់ជើងតូច) បណ្តាលឲ្យយុវតីរងរបួសធ្ងន់បាក់ជើងស្តាំ ។
ក្រោយកើតហេតុ ភាគីខាងម៉ូតូកង់បីជួយទំនាក់ទំនងទៅក្រុមគ្រួសារ ហើយជនរងគ្រោះប្រាប់ថា ឲ្យម៉ូតូកង់បីទៅចុះមិនប្តឹងផ្តល់អ្វីទេ មកពីគាត់ងងឹតវិលមុខទើបរេចង្កូតទៅបុកពីក្រោយម៉ូតូកង់បី ៕