រាជធាបីភ្នំពេញ ៖ អតីតមេធាវី អ៊ិត ពិសិដ្ឋរង្សី ដែលបាញ់គេរបួសកាលពីឆ្នាំ២០១៧ នៅក្បែរភូមិគ្រឹះរបស់អគ្គស្នងការនគរបាលជាតិ នាយឧត្តមសេនីយ៍ នេត សាវឿន ក្នុងសង្កាត់វាលវង់ ខណ្ឌ៧មករាកន្លងមកនោះ ឥឡូវនេះ ត្រូវបានស្ត្រីម្នាក់ ជាម្ចាស់ហាង ប្តឹងលោកមេធាវីរូបនេះ ពីបទបង្កអោយមានការខូចខាតទ្រព្យសម្បត្តិ រួចបើករថយន្តគេចខ្លួនបាត់ ។
បើយោងតាមគណនីហ្វេសប៊ុកមួយដែលមានឈ្មោះ Sokchanda Chhun បានបង្ហោះរូបភាព និងវីដេអូ អមដោយសារនៅថ្ងៃទី៨ កក្កដា ២០២០ អោយដឹងថា កាលពីថ្ងៃទី២៩ ខែមិថុនា ឆ្នាំ២០២០ នៅវេលាប្រហែលម៉ោង៩យប់ លោកអតីតមេធាវីឈ្មោះ អ៊ិត ពិសិដ្ឋរង្សី បានបើករថយន្ត ដែលមានស្លាកលេខ 2BC 5318 បានបុកចូលហាង នាងខ្ញុំដែលនៅសង្កាត់ក្រាំងធ្នង់ បានបង្កអោយមានការខូចខាតសម្ភារជាដំណំ រួចបានគេចខ្លួនបាត់ ។
គណនីហ្វេសប៊ុក Sokchanda Chhun បន្តថា នាងខ្ញុំបានដាក់ពាក្យបណ្តឹង នៅអធិការដ្ឋាននគរបាលខណ្ឌសែនសុខ ហើយស្វែងរកជនបង្ក អស់រយៈពេល៩ថ្ងៃ ទើបរកឃើញ រួចលោកនាយផ្នែកចររាចរណ៍ បានកោះហៅនៅថ្ងៃទី០៨ ខែកក្ដដា ឆ្នាំ២០២០នេះ នៅវេលាម៉ោង៩ព្រឹក តែជនបង្កមិនបានចូលរួមដោះស្រាយទេ នាងខ្ញុំសុំអោយលោកនាយផ្នែកចររាចរណ៍ ជួយធ្វើកំណត់ហេតុ គាត់បែរជាមិនព្រមធ្វើកំណត់ហេតុ អោយនាងខ្ញុំទេ ! នាងខ្ញុំសូមសំណូមពរដល់លោកអធិការខណ្ឌសែនសុខ ជួយអន្តរាគមន៍ដល់នាងខ្ញុំជង និងស្នើអោយជនបង្កហេតុ ចូលខ្លួន ដោះស្រាយសំណង ដល់នាងខ្ញុំផង ។
បើដូចអ្វីដែលស្ត្រីរងគ្រោះបានអះអាងមែននោះ គឺមេធាវីរូបនេះមានឈ្មោះ អ៊ិត ពិសិដ្ឋរង្សី ភេទប្រុស មានទីលំនៅផ្ទះលេខ៥៨៣ ផ្លូវលេខ១០១៩ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ។
ហើយមេធាវី អ៊ិត ពិសិដ្ឋរង្សី ធ្លាប់បាញ់បោះចំនួន២គ្រាប់ នៅក្បែរភូមិគ្រឹះអគ្គស្នងការនគរបាលជាតិ នាយឧត្តមសេនីយ៍ នេត សាវឿន ស្ថិតនៅតាមផ្លូវលេខ២១១ កែងផ្លូវលេខ២១៧ ក្នុងសង្កាត់វាលវល់ ខណ្ឌ៧មករា កាលពីវេលាម៉ោង១០និង៣០នាទីយប់ថ្ងៃទី១៨ ខែធ្នូ ឆ្នាំ២០១៧ ។
យោងតាមរបាយការណ៍របស់នគរបាលខណ្ឌ៧មករា កាលពេលនោះបានឲ្យដឹងថា មុនកើតហេតុ ជនសង្ស័យជាមេធាវី និងជនរងគ្រោះទាំង២ជាមនុស្សស្គាល់គ្នា ហើយបានញ៉ាំការ ជាមួយគ្នា តែពេលញ៉ាំការនោះ ជនបង្កចេញមកមុន ហើយបានទូរស័ព្ទហៅជនរងគ្រោះទៅទទួលទានបន្ត នៅហាងទារខ្វៃ នៅជិតផ្ទះអគ្គស្នងការនគរបាលជាតិ ស្ថិតនៅតាមបណ្ដោយផ្លូវមុនីរ៉េត ក្នុងសង្កាត់វាលវង់ ខណ្ឌ៧មករា តែជនរងគ្រោះមិនទាន់ចេញទៅភ្លាមៗទេ ។ រហូតយប់បន្តិច ជនរងគ្រោះក៏ចេញទៅជួប ពេលទៅដល់មុខហាងក៏ឃើញសន្តិសុខហាងគ្រាលោកមេធាវី ឡើងឡានទំនងស្រវឹង ជនរងគ្រោះក៏ទៅនិយាយសុំជូនទៅផ្ទះ ក៏ស្រាប់តែលោកមេធាវីដកកាំភ្លើងខ្លីម៉ាកឡុក បាញ់ទៅដី២គ្រាប់ បណ្ដាលឲ្យមួយគ្រាប់ បានទៅត្រូវមេជើងខាងស្ដាំ ជនរងគ្រោះឈ្មោះ លី តុលា ភេទប្រុស អាយុ២២ឆ្នាំ ហើយក៏បានយកកាំភ្លើងទៅភ្ជុងជនរងគ្រោះម្នាក់ទៀតឈ្មោះ សិដ្ឋ ព្រមទាំងបាននិយាយថា ហែង កុំចេះប្រយ័ត្នអញបាញ់ងាប់ ។ បន្តិចក្រោយមកក៏ត្រូវនគរបាលទៅដល់ ឃាត់ខ្លួនជនបង្កយកទៅសួរនាំ ។
ក្រោយពីបានឃាត់ខ្លួន ដើម្បីកសាងសំណុំរឿង នៅអធិការដ្ឋានខណ្ឌ៧មករា ចប់សព្វគ្រប់ នៅព្រឹកថ្ងៃទី២០ ខែធ្នូ ឆ្នាំ២០១៧នេះ សមត្ថកិច្ចបានបញ្ជូនខ្លួនលោកមេធាវី អ៊ិត ពិសិដ្ឋរង្សី ទៅកាន់អយ្យការអមសាលាដំបូងរាជធានីភ្នំពេញ ដើម្បីចាត់ការបន្តតាមច្បាប់ ពាក់ព័ន្ធបទល្មើស ហិង្សាដោយចេតនាមានស្ថានទម្ងន់ទោស និងបទ ប្រើប្រាស់អាវុធដោយគ្មានការអនុញ្ញាត ។
ជាមួយគ្នានេះដែរ អ្នកយកព័ត៌មាន KBN នៅមិនទាន់បានសុំការបំភ្លឺពីអតីតមេធាវី អ៊ិត ពិសិដ្ឋរង្សី នៅឡើយទេ ជុំវិញការចោទប្រកាន់ខាងលើនេះ ។ ទោះជាយ៉ាងណា KBN រងចាំការស្រាយបំភ្លឺ គ្រប់ភាគីទាំងសងខាង ៕
