រាជធានីភ្នំពេញ ៖ សំណង់ផ្ទះល្វែង និងវីឡា ជាច្រើនខ្នងបានសាងសង់ខុសច្បាប់ប្រលយចូលដីអនុក្រឹត្យបឹងតាមោកពេលនេះត្រូវបានអាជ្ញាធរខណ្ឌដឹកនាំដោយលោក សុខ សម្បត្តិ អភិបាល នៃគណៈអភិបាលខណ្ឌព្រែកព្នៅ និងមន្ត្រីពាក់ព័ន្ធចុះទៅត្រួតពិនិត្យ និងផ្អាកសាងសង់បណ្តោះអាសន្ន កាលពីព្រឹកថ្ងៃទី២៩ ខែមិថុនា ឆ្នាំ២០២០ កន្លងមកនេះ នៅចំណុចក្នុងភូមិឌួង និងភូមិផ្សារលិច ស្ថិតក្នុងសង្កាត់ព្រែកព្នៅ ខណ្ឌព្រែកព្នៅ ។
លោក ស៊ូ ស៊ីវត្ថា ប្រធានភូមិបាលខណ្ឌព្រែកព្នៅបានប្រាប់ឲ្យដឹងថា សំណង់ទាំងនេះមិនមានច្បាប់អនុញ្ញាត្តិឡើយ ដោយលួចសង់ខុសច្បាប់ សំណង់ខ្លះមានច្បាប់សាងសង់ត្រឹមតែផ្ទះល្វែងទេ តែពេលសាងសង់ជាផ្ទះវីឡាទៅវិញ ហើយសំណង់ខ្លះទៀតបានសាងសង់ចូលដីអនុក្រឹត្យបឹងតាមោគទៀត ។
លោកបានបន្តថា តាមពិតទីតាំងក្នុងបុរី ប៊ុន ជេស មានប្លង់កម្មសិទ្ធត្រឹមត្រូវ តែបែរជាលួចសាងសង់លើសច្បាប់អនុញ្ញាតិទៅវិញ ហើយដូចជាសំណង់នៅ ឡុង ឈិន ជាប់មហាវិធីឈ្នះៗ ក្រោយពីអាជ្ញាធរចុះហាមឃាត់បានតែមួយថ្ងៃ ស្អែកឡើងឃើញសាងសង់វិញ អត់មានគោរពច្បាប់អីបន្តិចសោះ ។
តាមប្រភពពីលោក សុខ សម្បត្តិ បានមានប្រសាសន៍ថា ការផ្អាកការដ្ឋានសំណង់ក្នុងសង្កាត់ព្រែកព្នៅនាពេលនេះ គឺអនុវត្តទៅតាមច្បាប់ និងធ្វើឡើងសំដៅការពារអាយុជីវិតប្រជាពលរដ្ឋ ។ ក្នុងការត្រួតពិនិត្យនេះរកឃើញថា សំណង់ដែលសង់ឡើងមិនស្របច្បាប់មានប្រមាណជិត១០០ផ្ទះ ដែលផ្ទះទាំងនោះភាគច្រើននៅក្នុងបុរី ប៊ុន ជេស ស្ថិតក្នុងភូមិឌួង និងបុរី ប៊ុន ជេស ស្ថិតក្នុងភូមិព្រែកព្នៅ ក្នុងការផ្អាកនេះដែរបើក្រុមហ៊ុននៅតែបន្តធ្វើទៀត អាជ្ញាធរ និងចាត់វិធានការរឹមអូសសម្ភារ ហើយបើមានការបាត់បង់ខូចខាត់អាជ្ញាធរមិនទទួលខុសត្រូវឡើយ ។
លោកបញ្ជាក់ថា ការដ្ឋានសំណង់ដែលត្រូវបានផ្អាក នឹងត្រូវអនុញ្ញាតឱ្យដំណើរការសាងសង់ឡើងវិញ លុះត្រាណាតែអនុវត្តការណែនាំមួយចំនួនដូចជា ម្ចាស់សំណង់ត្រូវបំពេញនូវចំណុចខ្វះខាត ផ្នែកបច្ចេកទេស និងច្បាប់ ម្ចាស់សំណង់ត្រូវរកអ្នកត្រួតពិនិត្យ និងបញ្ជាក់ ឬក្រុមហ៊ុនត្រួតពិនិត្យ និងបញ្ជាក់ ដែលមានអាជ្ញាបណ្ណ មកពិនិត្យ វិភាគ គណនា ពិសេសដើម្បីធានាសុវត្ថិភាពសំណង់ ៕