រាជធានីភ្នំពេញ ៖ កុមារី២នាក់ ត្រូវបានក្រុមសន្តិសុខសាលាខណ្ឌមានជ័យ ជួយសង្គ្រោះរំដោះចេញពីផ្ទះ ដែលកំពុងឆេះ ដោយម្ដាយមិននៅផ្ទះហើយចាក់សោទុកកូនស្រីឲ្យរៀន នៅក្នុងផ្ទះ ស្រាប់តែជួបរឿងបែបនេះតែម្តង ។
ហេតុការនេះកើតឡើងនៅវេលាម៉ោង១៤និង៣០នាទីរសៀលថ្ងៃទី៣០ ខែមិថុនា ឆ្នាំ២០២០ បណ្តាលឲ្យឆាបឆេះផ្ទះប្រជាពលរដ្ឋស្ថិតតាមបណ្ដោយផ្លូវលេខ២០៨ ផ្ទះលេខ3i ក្រុមទី២ ភូមិត្នោតជ្រុំ៤ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ ។
ម្ចាស់ផ្ទះរងគ្រោះខាងលើឈ្មោះ អ៊ឹង ពិសិដ្ឋ ភេទស្រី អាយុ៣៩ឆ្នាំ មុខរបរនៅផ្ទះ ។ ផ្ទះធ្វើអំពីថ្មបេតុង ទំហំ ៤ម៉ែត្រx១៦ម៉ែត្រ ) ។
ករណីខាងលើបណ្តាលឲ្យឆេះម៉ាស៊ីនត្រជាក់ និងសម្ភារមួយចំនួន និងពុំបណ្តាលឲ្យឆេះរាលដាលដល់ផ្ទះអ្នកជិតខាង និងមិនបណ្តាលឲ្យមានមនុស្សគ្រោះថ្នាក់ឡើយ ។
លោក ឌី រ័ត្នខេមរុណ អភិបាលរងខណ្ឌមានជ័យ បានថ្លែងអោយដឹងថា លោកជិះឆ្លងកាត់ទីតាំងកើតហេតុ ក៏មានប្រជាពលរដ្ឋ ស្រែកផ្អើលឲ្យជួយពន្លត់ភ្លើង ដែលឆេះផ្ទះ ។ ពេលនោះលោកក៏ចុះត្រួតពិនិត្យ និងដឹកនាំកម្លាំងគណ:បញ្ជាការឯកភាពខណ្ឌចុះជួយអន្តគមន៍ ពេលចូលទៅដល់ឃើញផ្ទះល្វែង បានចាក់សោជាប់ ស្រែកហៅអ្នកនៅក្នុងផ្ទះ ស្រាប់តែឃើញក្មេងស្រីតូចៗ ២នាក់ រត់បើកទ្វារ តែជាប់សោ ។ ក្រោយមកក៏ស្រែកអោយក្មេងអែបទៅម្ខាង កម្លាំងនាំគ្នាគាស់ទ្វារ យកក្មេងចេញមកខាងក្រៅ ដោយសុវត្ថិភាព មិនមានរងរបួសឡើយ គ្រាន់តែនាងតូចទាំង២នាក់ ភិតភ័យតែប៉ុណ្ណោះ ។
ក្នុងហេតុការណ៍នេះ គេឃើញមានរថយន្តរបស់ការិយាល័យពន្លត់អគ្គិភ័យរាជធានីភ្នំពេញ ចំនួន៣គ្រឿង ប្រើប្រាស់ទឹក អស់៣ឡាន ស្មើនឹង១២ម៉ែត្រគូប ទើបអាចពន្លត់ភ្លើងបានទាំងស្រុងនៅម៉ោង១៥ និង០០នាទីរសៀល នាថៃ្ងខែឆាំ្នដដែល ៕