ប្រទេសស៊ុយអែតបានបង្ហាញថា មានករណីឆ្លងមេរោគ Covid-19 ចំនួន ៦៨០០០ ករណី និងមានអ្នកស្លាប់ជាង ៥៣០០នាក់ ដែលច្រើនជាងចំនួនអ្នកដែលរស់នៅប្រទេស Scandinavian ភាគខាងជើងតំបន់អឺរ៉ុបទៅទៀត ។ ការរីករាលដាលនៃជំងឺឆ្លង Covid-19 បានកើតឡើងខ្លាំងធ្វើឲ្យប្រទេសស៊ុយអែតបាត់បង់លំហូរភ្ញៀវទេសចរពីជុំវិញពិភពលោក និងខាត់បង់ប្រាក់ចំណូលអស់ជាច្រើនពីវិស័យទេសចរណ៍ ។ នេះបើយោងតាមប្រភពពីទីភ្នាក់ងារសារព័ត៌មាន Sputnik ដែលបានចេញផ្សាយនៅថ្ងៃទី៣០ ខែមិថុនា ឆ្នាំ២០២០ នេះ ។
យោងតាមអង្គការពាណិជ្ជកម្ម Visita និយាយក្នុងនាមទូរទស្សន៍ជាតិ SVTថាវិស័យឧស្សាហកម្ម បដិសណ្ឋារកិច្ច និងវិស័យទេសចរណ៍ របស់ប្រទេសស៊ុយអ៊ែតកំពុងខាតបង់ទឹកប្រាក់ចំនួន៣៤លានដុល្លារអាមេរិក រាល់ថ្ងៃអំឡុងពេលផ្ទុះជំងឺឆ្លង Covid-19 នេះ ខណៈមានការហាមឃាត់ការធ្វើដំណើរជុំវិញពិភពមកកាន់ប្រទេសនេះដើម្បីបញ្ចៀសការឆ្លងរីករាលដាលជំងឺ Covid-19 ដែលជាហេតុធ្វើឲ្យវិស័យទេសចរណ៍របស់ប្រទេសស៊ុយអ៊ែតដែលល្បីល្បាញលើពិភពលោកត្រូវបាត់បង់លុយរាល់ថ្ងៃ ។
ភ្ញៀវទេសចរមកពីប្រទេសន័រវែស, ដាណឺម៉ាក, អាល្លឺម៉ង់, ហ្វាំងឡង់, ហូឡង់ និងអាមេរិកមានចំនួន ៧១ ភាគរយនៃភ្ញៀវទេសចរដែលចូលទៅលេងនៅក្នុងប្រទេសស៊ុយអ៊ែតនៅរដូវក្តៅ ដែលរបាយការណ៍កាលពីឆ្នាំមុនបានបង្ហាញថា ប្រទេសស៊ុយអ៊ែតកើបលុយពីវិស័យឧស្សាហកម្ម បដិសណ្ឋារកិច្ច និងវិស័យទេសចរណ៍បានដល់ទៅ៣,១ពាន់លានដុល្លារ ដោយរួមទាំងការស្នាក់នៅ ការបរិភោគនៅភោជនីយដ្ឋាន ការធ្វើដំណើរ ការទស្សនាតំបន់កំសាន្ត និងថ្លៃទិញទំនិញផ្សេងៗផងដែរ ៕